Այսօր միջազգային դիտորդների հետ հանդիպման ժամանակ, պատասխանելով միասնական շտաբի հայտարարության մեջ նշված լայնածավալ մեքենայություններին, մասնավորապես կրկնակի ընտրություններին, որոնք հնարավոր եղան դրոշմակնիքների վերանալու պատճառով, ԵԱՀԿ ԽՎ պատվիրակության ղեկավար Ֆրանսուա Խավիեր դե Դոնեան դրոշմակնիքների հետ կապված խնդրին այսպես արձագանքեց. «Երբ որ դեղագործից մի լուծույթ ես առնում, օգտագործելուց առաջ պետք է թափ տալ, ինչը որոշ տեղերի նախագահողներ մոռացել էին անել: Ցավալի է, որ դա տեղի ունեցավ, բայց վստահ չեմ, որ դա կարող է ազդած լինել արդյունքների վրա»:
ԵԱՀԿ ժողովրդավարական հաստատությունների և մարդու իրավունքների գրասենյակի ընտրությունների դիտորդական առաքելության ղեկավար Ռադմիլա Շեկերինսկան էլ նշեց. «Ցավով արձանագրում ենք փաստը, որ ԿԸՀ-ն մոռացել էր կամ որոշել էր չփորձարկել թանաքը: Փոխանակ շշերը թափահարելու, թեթևակի թափ տվեցին օրենքի որոշ դրույթներ, որպեսզի կարողանան գործընթացն առաջ տանել` մանավանդ հաշվի առնելով այն անվստահության մակարդակը, որ գոյություն ունի կուսակցությունների միջև»:
Ներկաներից մեկն էլ տեղեկացրեց իր հետ ընտրատեղամասերից մեկում պատահածը, երբ 15-20 հոգանոց խումբ է մտել` ձեռքներին ինչ-որ ցուցակներ և երբ ինքը փորձել է լուսանկարել, հեռախոսը ագրեսիվ կերպով խլել են իր ձեռքից:
Դիտորդները համաձայնեցին, որ դա միակ դեպքը չի եղել, բայց գնահատականներ չտվեցին` պնդելով, թե իրենք եկել են միայն ասելու, թե որքանով են Հայաստանի ընտրությունները համապատասխանում Ընտրական օրենսգրքին, բայց ոչ թե համեմատեն, թե Հայաստանն այլ երկրների հետ համեմատած ինչ ընտրություններ է անցկացրել, փոխարենը կարծիք հայտնեցին. «Բրիտանիայում ընտրությունները ծայրաստիճան ձանձրալի են, Հայաստանում շատ ավելի խանդավառ»:
Լուսանկարը՝ PanARMENIAN Photo-ի