Այսօր ԿԸՀ հրապարակած համամասնական ընտրակարգով ընտրությունների նախնական արդյունքներոմ ներառված չեն արտերկրում էլեկտրոնային քվեարկության թվերը, սակայն դրանք փոքր մեծություններ են: Այս մասին լրագրողներին տեղեկացրեց ԿԸՀ նախագահ Տիգրան Մուկուչյանը:
Նա հրաժարվեց արդյունքները գնահատել, քանի որ այսօր դիմում-բողոքների ընդունման գործընթացը պետք է ավարտվի, բայց խոստացավ վաղը կամ մյուս օրը բոլոր հարցերին պատասխանել ասուլիսի ընթացքում:
Անդրադառնալով թանաքների օքսիդացման խնդրին` Տ. Մուկուչյանը հայտարարեց. «Մտածել, որ որևէ քաղաքական ուժ, որովհետև մեղադրանքը կամ դրա ենթատեքստը, որ հնչեց, այնպիսին էր, որ հրահանգավորել էր առավոտյան 1-1.5 ժամ մասնակցել քվեարկությանը. եթե դա է դիտվում որպես փաստարկ, չեմ ուզում մեկնաբանել»:
Նա նշեց՝ անհասկանալի էր, թե որտեղից էին նախորդ օրը սփռվել կնիքի թանաքը ժամանակից շուտ ցնդելու մասին լուրերը, և շեշտեց, որ առաջարկել էր բոլորին գալ ու ստուգել: Տ. Մուկուչյանը հավաստիացրեց, որ կնիքի նյութը իր անձնագրում դեռ առկա է, և հավելեց, որ հանրապետությունում առկա են եղել բազմաթիվ ԸՏ-ներ, որոնցում նման խնդիր ընդհանրապես չի առաջացել:
ԿԸՀ նախագահը նշեց, որ ամփոփվելուց հետո մեծամասնականի արդյունքները կտեղակայվեն ԿԸՀ կայքում: Դիմում-բողոքները եղել են 3-ը. մեկը ներկայացվել է պատգամավոր Գալուստ Սահակյանի կողմից, մյուսը` «Թրանսփարենսի Ինտերնեյշնլ» կազմակերպության կողմից, իսկ երրորդը՝ ՀԿ-ի: Առաջինը, Տ. Մուկուչյանի խոսքով, վերաբերում է քվեարկության օրն իրականացվող քարոզչությանը, երկրորդը` iditort կայքի վրա տեխնիկական հարձակման խնդիրներին, որը նույն օրը վերականգնվել էր, երրորդում որոշակի խախտման փաստերի հղում է կատարվում տարբեր կայքերի ամրագրած տեղեկություններին: Քվեաթերթիկների վերահաշվարկի բողոքները կներկայացվեն այսօր:
ԿԸՀ նախագահը նաև նկատեց, թե աշխատանքները ԿԸՀ-ում կազմակերպվել էին «թափանցիկ»:
