Նախագահի պաշտոնի համար կպայքարեն 4 թեկնածուներ՝ անկուսակցական և գործազուրկ Վալերի Խաչատրյանը, գործող նախագահ Բակո Սահակյանը, Արցախի հերոս, ԱԺ պատգամավոր, ԼՂՀ պաշտպանության նախարարի նախկին տեղակալ Վիտալի Բալասանյանը, ագրարային համալսարանի Արցախի մասնաճյուղի փոխռեկտոր Արկադի Սողոմոնյանը:
Ստեփանակերտի նախկին քաղաքապետ Էդուարդ Աղաբեկյանը «Առաջին լրատվական»-ի հետ զրույցում ասաց, որ ինքը պատրաստվում է նախագահական ընտրությունների ժամանակ դառնալ Վիտալի Բալասանյանի վստահված անձը: Խոսելով ընտրությունների անցկացման մասին՝ պրն Աղաբեկյանն ասաց, որ եթե կարողանան անցկացնել նորմալ ընտրություններ, ապա Ղարաբաղյան գործընթացի վրա միայն դրական ազդեցություն կունենա. «Եթե ասեմ, որ ընտրություններից հետո Ղարաբաղյան հարցը կլուծվի, սխալ կլինի, բայց, այնուամենայնիվ, դրական տեղաշարժ կլինի: Մենք ինքներս պետք է այս հարցը լուծենք, այլ ոչ թե դա անենք ընտրությունների միջոցով»:
Էդուարդ Աղաբեկյանը նաև նշեց, որ համամասնական և մեծամասնական ընտրակարգով պատգամավորության թեկնածուները հանրային եթերից զրկված են, ըստ նրա՝ դա ղարաբաղյան դեմոկրատիայի առանձնահատկություններից է: Նախագահական ընտրությունների ժամանակ էլ տրամադրվում է 30 անվճար և 80 վճարովի րոպե եթեր. «Փառք Աստծո, այդ մեկն արգելված չէ»,- հավելեց նախկին քաղաքապետը:
