Ընտրությունների պատմության մեջ այս ընտրությունները նոր որակ ձևավորեցին. այսօր լրագրողների հետ հանդիպմանը նման տեսակետ հայտնեց «Ազատ հասարակության ինստիտուտի» ղեկավար Էդգար Հակոբյանը՝ ներկայացնելով անցկացված ընտրությունների վերաբերյալ գնահատականներն ու եզրակացությունները:
Նա նշեց, որ իրենց կազմակերպությունը հավատարմագրված լինելով ԿԸՀ-ում և ընտրատեղամասերում ունենալով շատ դիտորդներ՝ հետևել է ընտրական գործընթացներին: Դիտարկելով դիտորդների արձագանքները և համադրելով դրանք՝ կարող են հայտարարել, որ իրապես նոր որակի ընտրություններ են անցկացվել: Ըստ նրա՝ այն հավաստիացումները, որ տրվել էին ՀՀ նախագահի կողմից, իրականացվեցին։
«ԿԸՀ-ն իրականացրել է ծավալուն աշխատանք՝ 34 000 հանձնաժողովի անդամներ ատեստավորվել են, քաղաքացիական հասարակությունը, մեդիա ոլորտը լուրջ ձեռքբերումներ են ունեցել: Այս ընտրություններին մասնակցել է 1 500 000 մարդ՝ ընտրողների 62%-ը։ Բոլոր հասարակական կազմակերպությունների՝ ընտրություններին մասնակցելու կոչերը հանգեցրին նրան, որ մեզանում ընտրողների մասնակցության շատ լավ ցուցանիշ ապահովվեց»,- մանրամասնեց Էդգար Հակոբյանը:
Նա նկատեց, որ կատարյալ ընտրացուցակներ աշխարհում գոյություն չունեն, անգամ սկանդինավյան երկրներում, որտեղ առկա է էլեկտրոնային ցուցակների համակարգ: Է. Հակոբյանն ընդգծեց, որ նախորդ ընտրությունների հետ այս ընտրությունները համեմատության ոչ մի եզր չունեն:
Անդրադառնալով ընտրակաշառքներին՝ ասաց, որ երևույթն, անխոս, առկա է, բայց, ըստ նրա, գրանցված դեպքերը չեն ազդի ընտրության ընդհանուր պատկերի վրա: