Իսպանիայի թագավոր Խուան Կառլոս I-ը կատալոնական Բերգա փոքրիկ քաղաքում պերսոնա նոն գրատա է հայտարարվել: Համապատասխան որոշումը կայացրել է քաղաքային խորհուրդը, որին խիստ վրդովել էր վերջերս միապետի կատարած այցն Աֆրիկա: Այս մասին հայտնում է Associated Press-ը:
Աֆրիկայում թագավորը մասնակցել էր փղերի որսի, որը Պիրենեյան թերակղզում հուզումներ էր առաջացրել: Իսպանացիներին զայրացրել էր այն, որ միապետը որսացել է հազվագյուտ կենդանիների, ինչպես նաև այն, որ նա բացակայել է երկրից դժվար իրադրության պահին:
Ներկայումս Իսպանիան ծանր ֆինանսական ճգնաժամ է ապրում, «մեծ եռյակը» պարբերաբար իջեցնում է իսպանական առաջատար բանկերի վարկանիշները, և թագավորական պալատի քննադատների կածիքով՝ միապետը պետք է չափավորի իր «ախորժակը»:
Իրենց հերթին, Վայրի բնության համաշխարհային հիմնադրամի ակտիվիստները հայտնել են, որ հիմնադրամի պատվավոր նախագահի մասնակցությունը անդառնալի վնաս է հասցրել կազմակերպության հեղինակությանը:
Ավելի վաղ, Խուան Կառլոս I-ը ներողություն է խնդրել՝ ասելով, թե ինքը սխալ է թույլ տվել, և վստահեցրել է, որ այլևս նման բան չի կրկնվի: Բայց Բերգայի բնակիչները միապետին այդպես էլ չեն ներել:
Բերգան մտնում է Բարսելոնայի շրջանի կազմում, զբաղեցնում է 22,5 քառակուսի կմ տարածք, ունի շուրջ 20 հազար բնակչություն:
