Ամերիկյան հեռահաղորդակցական AT&T հսկան իր նախկին աշխատակցուհի Սյուզաննե Բաշիրին ավելի քան 5 մլն դոլար կվճարի աշխատավայրում խտրականություն դրսևորելու պատճառով: Այս մասին հայտնում է Associated Press-ը: 5 մլն դոլարի փոխհատուցումը Միսսուրի նահանգում նման գործերի համար մինչ օրս տրամադրված փոխհատուցումներից խոշորագույնն է:
Բաշիրը, որն արդեն մի քանի տարի Կանզաս սիթիի AT&T ընկերությունում զբաղվում էր օպտիկամանրաթելային ցանցերի հավաքմամբ, 2005 թվականին իսլամ է ընդունել: Այդ պահից ի վեր, նրա խոսքով, շրջապատը սկսել է թշնամաբար վերաբերվել իրեն: Գործընկերները սկսել են նրա հասցեին վիրավորական արտահայտություններ անել, Բաշիրին անվանել են ահաբեկչուհի: Նրան հաճախ հարցնում էին՝ արդյոք չի՞ պատրաստվում պայթեցնել ֆաբրիկայի շենքը:
Մի անգամ նրա ղեկավարը, որը մշտապես նկատողություն էր անում աշխատակցուհուն մահմեդական հագուստի պատճառով, նույնիսկ փորձել է պատռել նրա գլխի հիջաբը:
Բաշիրը մի քանի անգամ դիմել է ընկերության տնօրենին՝ խնդրանքով, որ նա թրեյնինգ անցկացնի աշխատակիցների հետ և ճնշի իր անմիջական ղեկավարին, սակայն տնօրենը ոչինչ չի ձեռնարկել: Բաշիրը 9 ամիս աշխատանքի չի եկել, որից հետո հեռացվել է:
Արդյունքում դատարանը որոշել է, որ ընկերությունը թշնամական միջավայր է ստեղծել աշխատակցուհու համար, և վճիռը կայացրել է հօգուտ Բաշիրի:
AT&T ընկերությունն արդեն անհամաձայնություն է հայտնել դատարանի որոշման հետ և մտադիր է բողոքարկել այն:
