Այսօր Հայ ազգային կոնգրեսի առաջնորդ Լևոն Տեր-Պետրոսյանն այցելել է ընտրությունների հանրային վերահսկողության միասնական շտաբ, որտեղ ՀՀ ԱԳ նախկին նախարար Վարդան Օսկանյանի հետ պատասխանել է լրագրողների հարցերին:
«ՀՀԿ-ի և ԲՀԿ-ի միջև հակասությունները կարելի է բացատրել նրանով, որ ՀՀԿ-ն սովոր էր, որ ԲՀԿ-ն լինի իր կրտսեր գործընկերը, իսկ այժմ ԲՀԿ-ն ուզում է անկախ լինել և գործել, իսկ ՀՀԿ-ն ճանաչում է միայն տիրոջ և հպատակի հարաբերություններ: ՕԵԿ-ը եղել և մնում է ՀՀԿ–ի հպատակը»,- այսօր հանրային վերահսկողության միասնական շտաբում ընտրությունների ընթացքի վերաբերյալ ասուլիսի ժամանակ հայտարարեց ՀԱԿ առաջնորդ Լևոն Տեր-Պետրոսյանը:
Նա շեշտեց, որ իրենք պահանջում են արդար, օրինական ընտրություններ, և որ կողմից որ խախտում կլինի, թող նրանք պատժվեն, այլապես «սելեկտիվ» պատիժն ընդունելի չէ. «Կարող է Կոնգրեսից էլ գտնեն, Դաշնակցությունից էլ գտնեն՝ թող պատժվի»:
Համատեղ ասուլիսի ընթացքում ԲՀԿ ներկայացուցիչ Վարդան Օսկանյանը նկատեց, որ իշխող կուսակցությունը փորձելու է բոլոր միջոցներով խախտի, և այն, ինչ տեսնում ենք այսօր, դրա ապացույցն է: Գումար բաժանած ԲՀԿ ներկայացուցչի վերաբերյալ նա նշեց, թե պետք չէ ամեն-ինչ սևը սպիտակով դիտարկել: Վ. Օսկանյանի խոսքով՝ ԲՀԿ-ն այլընտրանք է իշխող կուսակցությանը և համագործակցում է ՀԱԿ-ի և ՀՅԴ-ի հետ՝ արդար ընտրություններ ապահովելու համար. «Կկարողանանք՝ լավ, չենք կարողանա՝ լավ: Մեր հիմնական խնդիրն է բացահայտել բոլոր խախտումները, ահազանգել»:
Վ. Օսկանյանը հայտնեց, որ միջազգային դիտորդների հետ հանդիպում եղել է, և իրենք ներկայացրել են և՛ անձնագրերի վրա կնիքների անհետանալը, և՛ այլ խախտումներ:
Քաղաքագետների միության նախագահ Հմայակ Հովհաննիսյանի խոսքերով, ավելի վաղ միասնական շտաբի տարածած հայտարարության մեջ ասվում էր ընտրախախտումների մասին ոչ միայն դրոշմակնիքների մասով, այլ նաև վստահված անձի կողմից բողոքների մասով: Նա վստահեցրեց, որ բոլոր 3 շտաբերից խախտումների ահազանգերի նույն պատկերն ունեն, և բոլոր 3 ուժերը հավասարապես են խախտումներն արձանագրում: