Թիվ 13/09 ընտրատարածքում Հայ Ազգային Կոնգրեսի թեկնածու Մանուշակ Պետրոսյանի վստահված անձ Հովհաննես Գրիգորյանի ինքնազգացողությունը, իրավիճակով պայմանավորված նևրոտիկ ռեակցիայի հետևանքով կտրուկ վատացել է, ինչից հետո նա տեղափոխվել է հիվանդանոց: Այս մասին «Առաջին լրատվական»-ին հայտնեց ինքը՝ Մանուշակ Պետրոսյանը՝ հավելելով, որ Հովհաննես Գրիգորյանին փոխարինել են այլ վստահված անձով:
«Դե պատկերացրեք՝ ինչ իրավիճակ է եղել Թիվ 13/09-ում՝ ամենախայտառակ տեղամասերից մեկում: Գրիգորյանը քիչ առաջ մեզ մոտ էր: Ես նրան չթողեցի վերադառնալ ընտրատեղամաս»,- ասաց ՀԱԿ պատգամավորության թեկնածուն:
Մանուշակ Պետրոսյանի խոսքերով, 13/14 ընտրատեղամասում Դավիթ Բեկի 27 հասցեում բնակվող մի քաղաքացի եկել է քվեարկելու, սակայն տեսել է, որ իր անվան դիմաց արդեն իսկ այլ անձ է ստորագրել: «Իմ վստահված անձն այդ ընտրատեղամասի հանձնաժողովի նախագահ Արամ Մաճկալյանից պահանջել է արձանագրել խախտումը, սակայն նա հրաժարվել է: Մենք ի պատասխան դիմում-բողոք ենք գրել»,- ասաց ՀԱԿ անդամը: