Մայիսի 4-ին Հանրապետության հրապարակում պայթյունից այրվածքներ ստացած երիտասարդներն այսօր փորձում էին այդ նույն՝ ՀՀԿ կարգախոսով գազով լցված փուչիկները նվիրել Վարդան Օսկանյանին: Վերջինս հրաժարվեց դրանք վերցնելուց և, նստելով մեքենան, հեռացավ:
Հիշեցնենք, որ ՀՀ նախկին ԱԳ նախարար Վարդան Օսկանյանը Facebook-ի իր էջում գրել էր՝ «Ես ցնցված եմ Հանրապետության հրապարակում տեղի ունեցած միջադեպից: Ըստ լուրերի՝ ավելի քան երեսուն մարդ, հիմնականում՝ երեխաներ ու երիտասարդներ, այրվածքներ են ստացել: Առավել ցնցված եմ այն հանգամանքից, որ երկրի ղեկավարն այդ դեպքից հետո ներկայացրել է իր կուսակցության նախընտրական ծրագիրը: Ապշած եմ, որ այդ ամենին համերգ է հաջորդել: Ապշած եմ, որ երկրի իշխանությունները կարող են կրիտիկական պահին այդքան ոչ ադեկվատ լինել»:
