Եգիպտոսի ռազմական դատախազությունը 15 օրով
300 մարդու ձերբակալության հրաման է արձակել՝ Պաշտպանության նախարարության շենքի մոտ ուրբաթ օրը տեղի ունեցած անկարգությունների հետաքննության շրջանակներում: Այս մասին եգիպտական ԶԼՄ–ներին հայտնել է երկրի պաշտպանության նախարարության պաշտոնական ներկայացուցիչը:
«Նրանց մեղադրում են պետական կառույցներից մեկի վրա հարձակվելու, դրա գործառույթներին խոչընդոտելու, ծառայող զինված ուժերի դեմ ուժ կիրառելու, ճանապարհների փակման, հասարակական տրանսպորտի աշխատանքի խախտման, անօրինական ռազմական օբյեկտներում գտնվելու մեջ»,- ներկայացուցչի խոսքերը մեջբերում են ԶԼՄ-ները:
Պաշտպանության նախարարության տեղեկատվության համաձայն` երեկ տեղի ունեցած բախումների հետևանքով զոհվել է մեկ զինծառայող, վիրավորվել` մոտ 180–ը:
Եգիպտոսի առողջապահության նախարարությունը հայտարարել է, որ ցուցարարների շրջանում զոհվածներ չկան, կան տասնյակ վիրավորներ:
Հիշեցնենք, որ ուրբաթ օրը հարյուրավոր ցուցարարներ հավաքվել էին երկրի ՊՆ շենքի դիմաց՝ մասնակցելու զանգվածային բողոքի ակցիային: Ցուցարարները ճեղքել են շրջափակումը և փորձել մոտենալ գերատեսչության շենքին՝ քարեր նետելով անվտանգության աշխատակիցների վրա: Զինվորականները ստիպված են եղել կիրառել արցունքաբեր գազ: Զինվորականների հետ բախումները շարունակվել են գրեթե երկու ժամ:
Այս պահին զինվորականները վերահսկում են նախարարության շենքը և դրան հարող թաղամասերը: Միջադեպից հետո թաղամասում մտցվել է պարետային ժամ՝ մայիսի 4-ի ժամը 23:30-ից մինչև մայիսի 5-ը, ժամը 7:00-ն:
