Երեկ Հանրապետության հրապարակում տեղի ունեցած պայթյունի պատճառը կարող էր լինել միայն փուչիկները սխալ գազով փչելը: Այստեղ քիմիայի մասնագետների կարծիքները տարբերվում են. ոմանց կարծիքով՝ հնարավոր է, որ կիրառվել է հեղուկ գազ՝ գուցե մեթանի և պրոպանի խառնուրդ, որը եթե օդի հետ խառնվում է, պայթյունավտանգ է, և հավանաբար փուչիկներից արտահոսք է եղել:
Քիմիկոս Սերգեյ Երիցյանն «Առաջին լրատվական»-ի հետ զրույցում նշեց, որ փուչիկները կամ խաղալիքները անհրաժեշտության դեպքում լցնում են հելիում գազով, որն իներտ է և չի այրվում: Ըստ նրա՝ փուչիկները փչելու համար, ամենայն հավանականությամբ, երեկ օգտագործել էին ջրածին, որը շատ թեթև գազ է և հեշտությամբ վերև է բարձրանում:
«Հելիումը չայրվող գազ է, ոչ մի վտանգ չէր լինի դրանից, իսկ ջրածինը կիրառվում է նույն ջրածնային ռումբի արտադրության ժամանակ: Ջրածինը շատ հեշտությամբ թթվածնի հետ փոխազդում է, առաջացնում ջուր, ռեակցիան ջերմային է և կատարվում է բոցավառվելով: Կայծի կամ ուժեղ հարվածի կարիք կա»,- ասաց Ս. Երիցյանը՝ հավելելով, որ հրապարակում պայթյունի պատճառը կայծն է եղել, թեկուզ և կրակայրիչից էլ կարող էր լինել. «Բավական է մեկը բռնկվեր և շղթայական ռեակցիա է սկսվում»:
Ս. Երիցյանի խոսքով՝ ջրածինը հեշտությամբ կարելի է ստանալ և էժան է, հելիումն ավելի թանկ է: Նա հավանական չհամարեց, որ փուչիկները լցրած լինեն մեթանով կամ պրոպանով, քանի որ այդ գազերը ծանր են և վերև չեն բարձրանում. «Եթե նույնիսկ մեթան էլ են լցրել, շատ վտանգավոր բան են արել: Ե՛վ մեթանն է վտանգավոր, և՛ ջրածինը, և՛ ացետիլենը: Եվ անողները պետք է իմանային, որ դա ծանր հետևանք կարող է ունենալ:
