Վենետիկի իշխանությունները որոշել են վերականգնել քաղաքի ամենահայտնի կամուրջներից մեկը` Ռիալտոն: Այս մասին մայիսի 4-ին գրում է ANSA-ն:
Փորձագետների գնահատմամբ՝ ամեն տարի Ռիալտո կամրջով անցնում է 20 միլիոն զբոսաշրջիկ, ինչն այնքան էլ լավ չի անդրադառնում նրա պահպանվածության վրա: Աստիճանների վրա հաճախ են նկատվում ճաքեր, իսկ 2011 թ. փլուզվել էր սյունը: Սպասվում է, որ ամբողջական վերականգնումը կտևի 1.5 տարի և կավարտվի 2015 թ. ապրիլին: Վերջին անգամ կամուրջը վերականգնվել է ավելի քան 30 տարի առաջ:
Վերականգնման աշխատանքները գնահատվում են 5-7 միլիոն եվրո: Տնտեսական ճգնաժամի պայմաններում Վենետիկը նախատեսում է գտնել մասնավոր հովանավորներ: Որոշ տվյալների համաձայն՝ նախագծին կաջակցի Ռենցո Ռոսսոն` Diesel նորաձև հագուստի արտադրության սեփականատերը:
Ռիալտո կամուրջը վենետիկյան Գրանդ ջրանցքի ամենահին կամուրջն է: Ի սկզբանե այն եղել է փայտից: Ներկայիս քարե կառույցը ստեղծվել է 1588-1591 թթ.՝ ճարտարապետ Անտոնիո դե Պոնտեի նախագծով:
