Լիբիայի պետական գանձարանը բելգիական մայրաքաղաքի իր դեսպանատանն է փոխանցել մոտ 1.5 միլիոն եվրո, որից հետո այդ գումարի մեծ մասն առձեռն դուրս է բերվել: Նման տվյալներ է հաղորդվում Ֆինանսական տեղեկատվության վերլուծության բյուրոյի 2011 թ. հաշվետվության մեջ։ Այս մասին հաղորդում է ИТАР-ТАСС-ը:
Բյուրոն ստեղծվել է 1993 թ. և գործում է ազգային համակարգի շրջանակներում` ուղղված փողերի լվացման և ահաբեկչության ֆինանսավորման դեմ: Այն անկախ վարչական մարմին է, որը վերահսկվում է բելգիական արդարադատության նախարարության կողմից:
Լիբիայի դեսպանատան հաշիվների ստուգումը բելգիական բյուրոն իրականացրել է 2011 թ.: Ֆինանսական տեղեկատվության վերլուծության բյուրոյի տվյալներով՝ դիվանագիտական ներկայացուցչության հաշվի գումարները հավանաբար ստացվել են մի շարք լիբիական կազմակերպությունների կողմից:
Բյուրոյի ղեկավար Ժան-Կլոդ Դելեպյերը, պատասխանելով լրագրողների այն հարցին, թե արդյոք կան հիմքեր կասկածելու, որ Քադաֆիի հարազատները Բելգիայում Լիբիայի դեսպանատունն օգտագործել են պետական միջոցներն անօրինականորեն դուրս բերելու համար, նշել է. «Դա կասկածից վեր է»: Միաժամանակ նա, չբացելով բոլոր մանրամասները, ընդգծել է, որ վարչական մարմնի խնդիրը «փաստն ամբողջությամբ նկարագրելու» մեջ է:
2011 թ. մարտին ԵՄ Խորհուրդը Լիբիայի հանդեպ սահմանեց պատժամիջոցների երրորդ փուլը, որը նախատեսում էր ինչպես 9 ֆիզիկական անձանց, այնպես էլ լիբիական պետական կառույցների, Քադաֆիի վարչակարգի 11 բարձրաստիճան պաշտոնյաների բանկային հաշիվների սառեցում:
