Հայաստանյան քաղաքական գործընթացներին արտաքին ուժերի ամեն տեսակի միջամտություն երբեք հրապարակային չի լինում. եթե անգամ մի բան կատարվում է, կատարվում է գաղտնի կերպով: «Առաջին լրատվական»-ի հետ զրույցում նման տեսակետ հայտնեց Հայաստանի ԱԳՆ արտակարգ և լիազոր դեսպան Արման Նավասարդյանը:
«Ոչ ոք չի կարող ասել՝ այսինչ երկիրն աջակցություն է ցուցաբերում այսինչ կուսակցությանը, կամ աշխատում է մեկ այլ կուսակցության դեմ: Ճիշտ է, ԵՄ-ն, ԵԽ-ն, ըստ իրենց հայտարարությունների, շահագրգռված են, որ հայաստանյան ընտրությունները լինեն ազատ, արդար ու ժողովրդավար: Թե որքան են նրանք օգնում այս հարցում, չեմ կարող ասել: Միաժամանակ, այդ կառույցների հետ մեծ հույսեր չեմ կապում՝ ելնելով նախկին դառը փորձից»,- ասաց նա:
Հարցին՝ որո՞նք են հայաստանյան այն քաղաքական ուժերը, որոնք իրենց քաղաքական ապագան կապում են արտաքին այս կամ այն վեկտորի հետ, Արման Նավասարդյանը պատասխանեց. «Ոչ մի կուսակցություն, եթե խելքը գլխին ղեկավարություն ունի, բացահայտորեն չի ասի, որ հույսը կապում է այս կամ այն երկրի աջակցության հետ: Ոչ ոք նման բան չի ասի, բայց որ կան Արևմուտքի կամ Ռուսաստանի վրա հենվել ցանկացող նման քաղաքական ուժեր, ակնհայտ է»:
