Հայաստանը սովորական նախընտրական օրեր չի ապրում, քանի որ ամեն ինչ վերահսկվում է իշխանությունների կողմից: Այսօր կայացած մամուլի ասուլիսի ժամանակ այս մասին ասաց «Սարդարապատ» նախաձեռնող խմբի անդամ Ժիրայր Սեֆիլյանը:
«Ընտրությունները բեմադրություն են՝ նախօրոք կանխորոշված: Ամեն ինչ կանխորոշված է, կուսակցապետերը գիտեն՝ որքան քվեներ են ստանալու, իսկ ովքեր ինչ-ինչ կասկածներ ունեն, խնդրողի դերում են լինելու: Միանշանակ է, որ ընտրությունները կեղծվելու են, քանի որ կա միայն մեկ բեմադրիչ՝ Սերժ Սարգսյանը: Այնպես որ, պետք չէ լուրջ վերաբերվել բեմականացված գործընթացներին: Պետք է անել ամեն բան՝ գնալու այլընտրանքային իշխանության ձևավորման ճանապարհով, քանի որ ներկայիս վերնախավը հակահայ և ոճրագործ է:
«Սարդարապատ»-ը փրկությունը տեսնում է միայն պայքարող օջախների միավորված պայքարի մեջ»,- ասաց նա:
«Առաջին լրատվական»-ի հարցին՝ եթե ընտրելու իրավունք ունենար, որպես ՀՀ քաղաքացի՝ կմասնակցե՞ր արդյոք դրանց, Ժիրայր Սեֆիլյանը պատասխանեց՝ կգնար, քվեաթերթիկը կպատռեր ու կհեռանար ընտրատեղամասից:
Ամփոփելով՝ Ժիրայր Սեֆիլյանը հիշեցրեց, որ ԿԸՀ շենքի դիմաց արդեն երկրորդ օրն է՝ հացադուլ է անում Արտավազդ Վարդանյանը:
«Նա հացադուլն անցկացնում է հետևյալ լոզունգով. «Առանց Մարտի 1-ի սպանդի բացահայտման մայիսի 6-ի ընտրությունների ելքը կանխորոշված է»: Իսկ կանխորոշված ընտրությունները չեն կարող ելք լինել իրավիճակից: Ես ողջունում եմ Արտավազդի պայքարը, սակայն ընտրված ձևը կարող է վնասել նրան»:
