Անչափահասի սեռական անձեռնմխելիության իրավունքի խախտման համար Քրեական օրենսգրքով նախատեսված տուգանքը պետք է հանվի և փոխարինվի ազատազրկմամբ: Այս կարծիքին է «Կանանց ռեսուրսային կենտրոն» հասարակական կազմակերպությունը: Իսկ Նուբարաշենի թիվ 11 հատուկ դպրոցի ուսուցչի դատական գործընթացից հետո կենտրոնը ՀՀ փաստաբանների պալատի հետ համատեղ` ուսումնասիրելով այս ոլորտում Եվրոպայի և ԱՊՀ մի շարք երկրների փորձը¸ սկսել է մշակել օրենսդրական փոփոխությունների նախագիծ:
«Կանանց ռեսուրսային կենտրոն» հասարակական կազմակերպությունը նախագծի ավարտելուց հետո պատրաստվում է Ազգային ժողով ներկայացնել ՀՀ Քրեական օրենսգրքի 18-րդ գլխի (Սեռական անձեռնմխելիության և սեռական ազատության դեմ ուղղված հանցագործություններ) 138-142 հոդվածներում փոփոխություններ և լրացումներ կատարելու առաջարկը: Նախագծի հեղինակները առաջարկում են խստացնել օրենքով նախատեսված պատիժը այն դեպքերում¸ երբ սեռական բռնի գործողությունները կատարվել են հղի կնոջ նկատմամբ, զենքի կամ որպես զենք օգտագործվող այլ առարկայի գործադրմամբ, 14 տարին չլրացած անձի նկատմամբ, անչափահասի նկատմամբ ծնողի կամ խնամակալի կողմից, և ուղղիչ հիմնարկներում, կալանավայրերում, զորամասում, բուժհաստատություններում:
Բացի դրանից` նախագծում իրավապաշտպաններն առաջարկում են գործող օրենքով սահմանված անչափահասության 16 տարին փոխարինել 18-ով, քանի որ ամբողջ աշխարհում երեխա է համարվում 0-18 տարեկան անձը: Նախագծի հեղինակների համոզմամբ` գործող օրենքով սահմանված վաղեմության ժամկետը երկարացնելու եւ չափահասության տարիքից հաշվարկելու դեպքում այն անչափահասը, ով խոցելի վիճակում գտնվելով չի պաշտպանել իր իրավունքը հանցագործության կատարման պահին, հնարավորություն ունենա դատարան դիմել չափահաս դառնալուց հետո:
