ԱՄՆ-ը պատրաստվում է նոր մարտավարություն կիրառել Սիրիայի հարցում, եթե Անանի ծրագիրը տապալվի, և շարունակել Ռուսաստանի հետ այդ երկրում դրության կարգավորման հետ կապված խնդիրների քննարկումը: Այս մասին, ինչպես հաղորդում է Fox News հեռուստաալիքը, այսօր տեղի ունեցած ճեպազրույցում հայտարարել է Սպիտակ տան պաշտոնական ներկայացուցիչ Ջեյ Քարնին:
«Առայժմ Քոֆի Անանի ծրագիրը կատարել չի հաջողվել և չի հաջողվում: Եթե այն տապալվի, անհրաժեշտություն կառաջանա խորհրդակցություն անցկացնել ՄԱԿ-ի Անվտանգության խորհրդի մեր գործընկերների հետ: Եվ, բնականաբար, այդ բանակցություններում նախատեսվում է նաև Ռուսաստանի մասնակցությունը»,- ասել է Քարնին:
Հիշեցենք. ապրիլի 16-ից Սիրիայում աշխատում են միջազգային դիտորդները: Նման ձևով միջազգային հանրությունը փորձում է դադարեցնել ՄԱԿ-ի տվյալներով՝ ավելի քան 9000 մարդու կյանք խլած բախումները: Դիտորդների խնդիրն է հետևել Անանի ծրագրով նախատեսված հրադադարի ռեժիմի պահպանմանը, որն ուժի մեջ է մտել ապրիլի 12-ից: Չնայած դրան՝ ժամանակ առ ժամանակ և՛ իշխնությունների, և՛ ընդդիմության կողմից հրադադարի խախտման դեպքեր հաճախակի գրանցվում են:
