Միջին հաշվով, Գերմանիայի յուրաքանչյուր քաղաքացի տարեկան խմում է 107.2 լիտր գարեջուր: Ինչպես հաղորդում է Deutsche Welle-ն, այսպիսի տվյալներ են հրապարակվել երկրի սպառողների իրավունքների պաշտպանության, պարենամթերքի և գյուղատնտեսության նախարարության հաշվետվության մեջ:
Առաջին հայացքից այս թիվը բավական մեծ է երևում, սակայն հաշվի առնելով 10 տարի առաջ հրապարակված տվյալները՝ ակնհայտ է, որ գերմանացաիները սկսել են ավելի քիչ գարեջուր օգտագործել, իսկ գարեջուր արտադրող ընկերությունների հասույթը գնալով նվազում է:
2003 թ. միջին վիճակագրական գերմանացին խմում էր տարեկան 118 լիտր գարեջուր, իսկ այդ խմիչքն արտադրող ընկերությունների եկամուտը միջինը կազմում էր 9 մլրդ եվրո: 2011 թ. ընկերությունները վաստակել են 7.85 մլրդ եվրո: Բացի այդ, հաշվետվության մեջ նշվում է, որ Գերմանիայում գարեջուրը շարունակում է մնալ տղամարդու խմիչք, կանայք այն 7 անգամ ավելի քիչ են օգտագործում:
Այնուամենայնիվ, գարեջուրը մնում է աշխարհում ամենաշատ օգտագործվող ալկոհոլային խմիչքը, իսկ ընդհանրապես խմիչքների շարքում այն զիջում է միայն ջրին և թեյին:
Գարեջրի օգտագործման համաշխարհային բացարձակ առաջատար է Չեխիան, որտեղ մեկ շնչին բաժին է ընկնում տարեկան 158 լիտր: Այնուհետև հաջորդում են Իռլանդիան (130 լիտր) և Գերմանիան (107.2 լիտր):
