Ֆրանսիացի նկարիչ Փոլ Սեզանի ջրաներկով նկարված էսքիզը, որն առնչություն ունի «Խաղաթուղթ խաղացողները» հայտնի շարքի հետ, մայիսի 1-ին Նյու Յորքում բացված Christie’s աճուրդի տանը վաճառվել է 19 մլն դոլարով: Այս մասին հայտնում է Agence France-Presse-ը:
Սեզանի էսքիզը վաճառվել էր «Իմպրեսիոնիզմի և մոդեռնիզմի արվեստը» խորագրի ներքո ցուցադրվող արվեստի գործերի թվում: Մինչ աճուրդը էսքիզը գնահատվել էր 15-20 մլն դոլար:
Էսքիզը 46.7-ը 30.5 սմ-ի վրա ջրաներկ է, որը վերջին անգամ հանրությանը ներկայացվել էր 1953 թ.: Աշխատանքը, որը հայտնի էր միայն սև-սպիտակ լուսանկարից, վերջին 60 տարում համարվում էր կորած: Այն հայտնաբերվել է սեպտեմբերին մահացած տեխասցի հայտնի բարերար Հայնց Էյխենվալդի հավաքածուում:
«Խաղաթուղթ խաղացողները» շարքը բաղկացած է 5 նկարներից, որոնք Սեզանը վրձնել է 1890-1896 թթ.: Նկարները առանձնանում են միմյանցից խաղաթուղթ խաղացողների թվով ու չափերով: 4 նկարները պահվում են թանգարանում, 5-րդը 2012 թ. փետրվարին 250 մլն դոլարով ձեռք է բերել Կատարի էմիրը:
Մայիսի 1-ի աճուրդում վաճառվել են նաև Անրի Մատիսի «Քաջվարդերի փունջը» նատյուրմորտը (19.2 մլն դոլարով) և Պաբլո Պիկասոյի «Քնածը» (Մարիա-Թերեզա Վալտեր) կտավը 9.8 մլն դոլարով:
