Վրաստանի գիտնականները մշակել են երկրի սոցիալ-տնտեսական զարգացման ծրագիր: Այն տպագրվել է բրոշուրի տեսքով: Ծրագրի հեղինակներն են Ալեքսանդր Տվալչրելիձեն, Ավթանդիլ Սիլագաձեն, Գիուլի Կեշելաշվիլին և դավիթ Գելիյան:
Ծրագիրն իրականացվել է «Լոզանի» կայուն զարգացման միջազգային ֆոնդի աջակցությամբ: Ծրագրում ներկայացված են այն միջոցառումները, որոնք պետք է իրականացվեն Վրաստանի սոցիալ-տնտեսական իրավիճակի բարելավման և զարգացման համար: Մասնավորապես` դրանք վերաբերում են երկրի հանքային ռեսուրսների խելամիտ օգնագործմանը և տեղական արտադրության ու գյուղատնտեսության զարգացմանը օժանդակելուն:
Ծրագրի իրականացման դեպքում 7 տարի հետո կրթության ոլորտում կմոբիլիզացվեն 4 անգամ ավելի շատ միջոցներ, քան կա այսօր, առողջապահության ոլորտում` 4.5 անգամ, մշակույթի ու սպորտի ոլորտում` 7 անգամ, սոցիալական պաշտպանվածության ոլորտում` 7.37 անգամ: Արդյունքում Վրաստանի յուրքանչյուր քաղաքացի կունենա սոցիալական ապահովագրություն (կյանքի, ունեցվածքի և այլն), թոշակները կմեծանան 6 անգամ, կրթության ոլորտի աշխատողների միջին աշխատավարձը` 4 անգամ, քաղաքացիական ծառայողների աշխատավարձը` 2 անգամ:
Գործազրկության մակարդակը կիջնի մինչև միջինեվրոպական մակարդակի, իսկ բոլոր գործազուրկները կստանան գործազրկության նպաստներ, որը մեծ կլինի կենսապահովման նվազագույն զամբյուղից: Դրանից բացի, ծրագրի իրականացման դեպքում 2030թ. Վրաստանում 1 շնչի հաշվով ՀՆԱ-ն կկազմի ավելի քան 20 հազար դոլար, իսկ համախմբված բյուջեն` ավելի քան 32 մլրդ դոլար: Ծրագրի հեղինակները շեշտում են, որ ծրագրի իրականացման համար անհրաժեշտ չի լինի լրացուցիչ արտասհամնայան վարկեր վերցնել ու գրանտներ ստանալ: Նշենք նաև, որ ծրագրի հեղինակների խոսքով` շնորհանդեսին դիտավորյալ չեն հրավիրվել քաղաքական գործիչներ, որպեսզի ծրագիրը չքաղաքականացվի: