«Հուսով եմ՝ Ս. Սարգսյանի խոստումը միայն նախընտրական չէ»: Այսօր «Առաջին լրատվական»-ի հետ զրույցում նման հույս հայտնեց Մաշտոցի պուրակի կրպակների ապամոնտաժող խմբի անդամ, ճարտարապետ Օշին Եղիազարյանը՝ խոսելով նախագահի այսօր արձակած՝ Մաշտոցի պուրակի կրպակների ապամոնտաժման հանձնարարականի շուրջ:
Նա նշեց, որ իրենք միշտ պաշտպանել են և կշարունակեն պաշտպանել հանրային շահը: Ըստ ակտիվ ճարտարապետի` սա միայն սկիզբն է պայքարի և հաղթանակների:
«Հուսով եմ` նախագահի այդ խոստումը միայն նախընտրական չէ և կշարունակվի բոլոր հարցերում` կմաքրվեն բոլոր այգիները, այդ թվում՝ Թեղուտի հարցը ևս կլուծվի: Ես կարող եմ ասել, որ գոհ եմ. ավելի լավ է ուշ, քան երբեք»,- ասաց Օ. Եղիազարյանը:
Հիշեցնենք, որ այսօր ՀՀ նախագահ Սերժ Սարգսյանը քաղաքապետ Տարոն Մարգարյանի հետ եղել է պուրակում և հանձնարարական է տվել ապամոնտաժել կրպակները:
