Հերմինե Նաղդալյանն անցած տարի օտարել է 100%-ով իրեն պատկանող «ԲեգՄիք» ՍՊԸ-ի բաժնետոմսերը: Այս մասին տեղեկանում ենք ԿԸՀ-ից «Առաջին լրատվական»-ին տրամադրված գույքի և եկամուտների հայտարարագրից: Նա որևէ այլ ձեռնարկությունում բաժնեմաս չի հայտարարագրել:
ՀՀԿ համամասնական ցուցակի 11-րդ տեղում գտնվող Հ. Նաղդալյանն անցած տարի բանկերից վերցրել է 58 մլն դրամ վարկ (փոխառություն): Նաև փոխառություն է վերցրել «ԲեգՄիք» ՍՊԸ-ից՝ մոտ 81.9 մլն դրամ, նաև՝ ենթադրաբար իրեն պատկանող, բայց հայտարարագրում չնշված, «Սիսիանի ԲՈՒԱՏ» ՍՊԸ-ից՝ 42.9 մլն դրամ:
Հ. Նաղդալյանի եկամուտներն անցած 1 տարում կազմել են 598 մլն 785 հազ. դրամ, որից 3.153 մլն-ը՝ ԱԺ աշխատավարձ, 255.431 մլն-ը՝ «Սիսիանի ԲՈՒԱՏ»-ից շահաբաժին, 340.201 մլն դրամը՝ «ԲեգՄիք»-ից շահաբաժին:
2012 թ. մարտի 1-ի դրությամբ Նաղդալյանն ունեցել է 100 մլն դրամ և 30 հազ. դոլար գումար: Նա չի հայտարարագրել որևէ շարժական գույք կամ 8 մլն դրամը գերազանցող իր:
Բավական հարուստ է Հ. Նաղդալյանի հայտարարագրի անշարժ գույքի բաժինը: Ըստ դրա՝ նա ունի Սարի թաղում 376 քմ մակերեսով տուն՝ կից հողամասով, 2 բնակարան Գ. Չաուշի փողոցի վրա նույն շենքում՝ 102.8-ական քմ մակերեսով, Ծովակալ Իսակովի պողոտայում 414 քմ մակերեսով տուն՝ կից հողամասով, դրանից քիչ հեռու գտնվող 0.35 հա հողամաս, նաև 4 կտոր հողամաս Դավիթ Անհաղթի փողոցում՝ ընդհանուր 0.6 հա տարածքով:
