CNN Türk-ի փոխանցմամբ՝ ուշագրավ միջադեպ է տեղի ունեցել Իգդիրի նահանգում: Նահանգի Քարաքոյունլու շրջանի Ստորին Ալիջան գյուղի բնակիչները որոշել են յուրովի բողոքել գյուղական պահապանների գործողությունների դեմ:
Նշենք, որ գյուղական պահապանների համակարգը լայնորեն գործում է Թուրքիայի արևելյան և հարավարևելյան հատվածներում և նախատեսված է գյուղերը Քրդստանի աշխատավորական կուսակցության (PKK) զինյալներից պաշտպանելու համար:
Չնայած դրան՝ գյուղական պահապանները չեն խորշում գյուղացիներից դրամական շորթումներ իրականացնելուց և այլ ապօրինի գործողություններից: Դրանից դժգոհ Իգդիրի գյուղացիները բողոքի ակցիա են կազմակերպել շրջկենտրոնում գտնվող Թուրքիայի Հանրապետության հիմնադիր Մուսթաֆա Քեմալ Աթաթուրքի հուշարձանի մոտ:
Այստեղ նրանք դիմել են Աթաթուրքին՝ նշելով. «Հա՛յր, տե՛ս, թե ինչ օրն ենք ընկել»: Գյուղացիներից մեկը նշել է, որ իրենք փորձել են իրենց խնդիրները լուծել իրավական ճանապարհով, սակայն ոչինչ չի ստացվել և արդյունքում իրենք որոշել են ակցիա կազմակերպել Աթաթուրքի հուշարձանի մոտ:
Գյուղացիները պատրաստակամություն են հայտնել քայլերթով հասնել մինչև անգամ Անկարա:
