Ինչպես հաղորդում է Bloomberg գործակալությունը, Թուրքիան շահագրգռվածություն է արտահայտել մասնակցելու Եվրո 2012-ի համար կառուցվող մարզական օբյեկտների կառուցմանը: Այս մասին խոսվել է Թուրքիայի վարչապետ Ռեջեփ Թայիփ Էրդողանի` Կիև կատարած այցի ժամանակ:
Թուրքիայի վարչապետի հետ Ուկրաինայի մայրաքաղաք էին մեկնել բազմաթիվ գործարարներ, որոնք ցանկանում են ներդրումներ կատարել ուկրաինական տնտեսության մեջ և մասնակցել շինարարական մի շարք տենդերների:
Թուրքիայի վարչապետը Ուկրաինայի նախագահի հետ հանդիպման ժամանակ հայտարարել է, որ Եվրո 2012-ին ժամանակ չի մնացել` ակնարկելով, որ Ուկրաինան դեռ չի ավարտել անհրաժեշտ մարզադաշտերի շինարարությունը. «Դուք գիտեք, որ թուրքական շինարարական ոլորտը հզորությամբ աշխարհում երկրորդ տեղում է Չինաստանից հետո, և մենք ցանկանում ենք, որ մեր ընկերությունները Ուկրաինայում մասնակցեն տենդերներին, շահեն դրանք ու իրականացնեն նախագծեր»,- ասել է Էրդողանը:
Թե ինչ արդյունք են ունեցել Թուրքիայի վարչապետի այս հայտարարությունները՝ ցույց կտա ժամանակը: