Ձիու միսը ուտելու համար թույլատրելի է, պարզապես այստեղ խաբեության են դիմում, քանի որ ձիու միսը ընդունում են 450 դրամով, այնինչ տավարի մսի գնով` 2200 դրամով են վաճառում, այն էլ՝ առանց ասելու, որ դա տավարի միս չէ։ Մեկնաբանելով վերջերս Վանաձորում տավարի մսի փոխարեն ձիու միս վաճառելու դեպքը՝ ասաց գյուղնախարարության անասնաբուծության և տոհմային գործերի վարչության պետ Աշոտ Հովհաննիսյանը։ Մեր այն հարցին, թե ձիու միսը պիտանի՞ է ուտելու համար և, եթե այո, ինչո՞ւ բաց վաճառք չի իրականացվում, Ա. Հովհաննիսյանը պատասխանեց, որ դա կապված է ազգային սովորությունների հետ. մեր ժողովրդի մեջ դա ընդունված չէ։ «Օրինակ՝ Կենտրոնական Ասիայի երկրներում ձիու միսը հատկապես լայն կիրառություն ունի երշիկի արտադրության մեջ։ Եվ ձիու միսը մի քիչ քաղցրահամ է։ Խորհրդային տարիներին Հայաստանում մինչև 12 հազար ձի ենք ունեցել, և եթե, օրինակ, մեկի ոտքն է կոտրվել, կամ հարկավոր է եղել ու մորթել ենք, պահել ենք կոմբինատի սառնարանում՝ մինչև կհավաքվեր 1 կամ 2 վագոնի չափով միսը, որը ուղարկում էինք Միջին Ասիա, իսկ նրանք էլ տավարի միս էին մեզ տալիս»,- մանրամասնեց գյուղնախարության անասնաբուծության և տոհմային գործերի վարչության պետ Աշոտ Հովհաննիսյանը։