«Ժառանգությունը» լինելու է այն սակավ ուժերից մեկը, որը ցույց է տալու նախընտրական շրջանում կատարած իր բոլոր ծախսերը. այսօր կայացած մամուլի ասուլիսի ժամանակ այս մասին ասաց կուսակցության ղեկավար Րաֆֆի Հովհաննիսյանը:
«Բոլորն են տեսնում` քանի տեսահոլովակ ու ցուցապաստառներ ունենք: Եվ մենք էլ տեսնում ենք, թե որքան ունեն մյուս քաղաքական ուժերը»,- ասաց նա:
Հովհաննիսյանի խոսքով՝ եթե շարքային պատգամավորը, վարչապետն ու նախագահը ավելի համեստ կյանքով ապրեն, ՀՀ բյուջեն կկրկնապատկվի:
«Այստեղ կախարդական դրույթներ պետք չեն. պարզապես պարկեշտ կառավարում է անհրաժեշտ. ճարպը պետք է հանվի բյուջեից»,- ասաց նա:
Անդրադառնալով աճող արտագաղթի տեմպերին` Րաֆֆի
Հովհաննիսյանը նշեց, որ եթե 97 տարի առաջ մեր պատմական հայրենիքի մեծ մասը և ավելի քան 1,5 մլն բնակչություն կորցրել ենք թշնամու պատճառով, ապա վերջին 20 տարիներին 1 մլն քաղաքացու կորցրել ենք ոչ թե թշնամու, այլ մեր մեղքով:
Կուսակցության ղեկավարը նաև նշեց, որ «Ժառանգության» թիրախը ՀՀԿ-ն է: «Միաժամանակ, համաձայն չեմ Ստեփան Սաֆարյանի այն տեսակետին, թե ընտրությունների վերահսկման միասնական շտաբը Ռոբերտ Քոչարյանի շահերին սպասարկող կառույց է»,- ասաց նա:
Խոսելով հայ-թուրքական հարաբերությունների կարգավորման հեռանկարի մասին` Հովհաննիսյանը նշեց, որ եթե Թուրքիան այսուհետ ևս խոսի նախապայմանների լեզվով, Հայաստանը պետք է դուրս գա 20 տարվա զուսպ ու հավասարակշիռ քաղաքականությունից և իր պահանջները դնի այդ երկրի առջև:
Լրագրողներից մեկի հարցին` ինչպե՞ս կբացատրի ՀԱԿ ղեկավարի այն խոսքերը, որ ինքը հաճախ չի հասկանում «Ժառանգության» վարքագիծը, Րաֆֆի Հովհաննիսյանը խորհուրդ տվեց պարզաբանումներ ստանալ հենց Լևոն Տեր-Պետրոսյանից:
