Սիրիայի ընդդիմության զինված խմբավորումները հարյուրավոր խախտումներով կարող են խոչընդոտել ՄԱԿ-ի և ԱՊԼ հատուկ բանագնաց Քոֆի Անանի ծրագրի իրականացմանը. այս մասին հայտարարել է ՄԱԿ-ում Սիրիայի մշտական ներկայացուցիչ Բաշար Ջաֆաարին՝ ելույթ ունենալով Անվտանգության խորհրդում:
Ինչպես հաղորդում է ITAR-TASS-ը, նրա խոսքերով՝ Սիրիայի իշխանությունները գլխավոր քարտուղարին և ՄԱԿ-ի ԱԽ-ին պարբերաբար ներկայացնում են փաստագրական հաշվետվություններ, որոնք վկայում են ընդդիմության կողմից ապրիլի 12-ին ուժի մեջ մտած հրադադարի ռեժիմը խախտելու մասին:
«Ապրիլի 20-ի դրությամբ՝ նման խախտումների թիվը 593 է»,- ասել է նա:
Ջաֆաարին խոր անհանգստություն է հայտնել, որ այդ խմբավորումները նախկինի պես անտեսվում են այն դեպքում, երբ «Սիրիայի իշխանությունների և բանակի սատանայացման մշտական քաղաքական արշավ է տարվում, որոնք մեղադրվում են այդ խմբավորումների դեմ կիրառվող հանցագործությունների մեջ, և դրանով իսկ աղավաղվում են փաստերը»:
Նրա համոզմամբ՝ այդ ջանքերի նպատակն է «տապալել Անանի ծրագիրը և դրա պատասխանատվությւնը դնել Սիրիայի զինված ուժերի վրա, որպեզի կարողանան մարդասիրական պատճառաբանությամբ երկրում ռազմական գործողություններ ծավալել՝ նույն կեղծ մեղադրանքներով, որոնք հանգեցրին Լիբիայի ենթակառուցվածքների կործանմանը և 150 հազար խաղաղ բնակիչների ոչնչացմանը՝ ՆԱՏՕ-ի ուժերի օգնությամբ և Կատարի մասնակցությամբ»:
Բացի այդ, Սիրիայի դեսպանը ԱԽ-ում հավաստիացրել է, որ իր երկրի կառավարությունը պատրաստ է ստորագրել արձանագրություն, որով կկարգավորվի ՄԱԿ-ի դիտորդների գործունեության կարգը՝ նախօրոք ձեռք բերված փոխհամաձայնության հիման վրա»:
«Իմ երկիրը կենսականորեն շահագրգռված է դիտորդների առաքելության հաջողությամբ, քանի որ կայունություն և անվտանգություն է ցանկանում իր քաղաքացիների համար,- ասել է Ջաֆաարին՝ կոչ անելով միջազգային դիտորդներին իրենց աշխատանքը կառուցել «օբյեկտիվության և պրոֆեսիոնալիզմի վրա»:
Սակայն Բաշար Ջաֆաարին հավելել է, որ «միայն Սիրիայի կառավարության աջակցությունը բավարար չէ հաջողության հասնելու համար»: Սիրիացի դիվանագետը պահանջել է «միջազգային, տարածաշրջանային և արաբական խմբերին դադարեցնել զինված խմբավորումների ֆինանսավորումը և վերապատրաստումը, զերծ մնալ նրանց ահաբեկչական գործողությունների շարունակմանը հրահրող քայլերից»:
