Խարտումում բողոքական մշակութային կենտրոնը ենթարկվել է ծայրահեղականների հարձակմանը, կիրակի օրը հաղորդում է France Press գործակալությունը` հղում անելով այդ կրոնական հաստատության պաստորին:
Նրա խոսքով` շաբաթ առավոտյան մոտ հարյուր մարդ ներխուժել է կենտրոնի տարածք, այրել Սուդանի ավետարանչական պրեսբիտերականության եկեղեցու տնտեսական շինությունները և ուսումնական կենտրոնը: Այրվել է երեք աղոթասրահ, բնակելի համալիր, իմչպես նաև Աստվածաշնչի բազմաթիվ օրինակներ:
«Հարձակվողների մեծ մասը եղել են իսլամիստ ծայրահեղականներ»,-հայտարարել է պաստորը:
Քրիստոնեական մշակությային կենտրոնի վրա հարձակումը տեղի է ունեցել Սուդանի և Հարավային Սուդանի լարված հարաբերությունների ֆոնի վրա: Սուդանի պետական կրոնը իսլամն է, իսկ Հարավային Սուդանի բնակչության զգալի մասը քրիստոնեություն են դավանում:
Սուդանի և Հարավային Սուդանի սահմաններին շարունակվում են պարբերաբար տեղի ունեցող բախումները: Տարվա սկզբից Խարտումը և Ջուբան մի քանի անգամ հայտարարել են միմյանց միջև պատերազմի սկսման հնարավորության մասին:
