Gallup International-ի և Հանրային կարծիքի ուսումնասիրության համառուսաստանյան կենտրոնի (ВЦИОМ) միջև զուգահեռներ անցկացնելիս սոցիոլոգ Ահարոն Ադիբեկյանը առավել արժանահավատ և քաղաքական շեշտադրումներից զերծ է համարում ВЦИОМ-ի կողմից անցկացված և երեկ ներկայացված սոցհարցման տվյալները: Նման տեսակետ նա հայտնեց «Առաջին լրատվական»-ի հետ զրույցում:
«Հանրային կարծիքի ուսումնասիրության համառուսաստանյան կենտրոնի (ВЦИОМ) տվյալները բառացիորեն կրկնում են իմ ունեցած տվյալները, նույնիսկ մեկ տոկոսի տարբերություն չկա: Նույնն է անգամ ընտրանքի թիվը. իմ հարցումներում մարդիկ 1650-ն են, իսկ ВЦИОМ-ի դեպքում՝ 1600-ը: Միակ տարբերությունն այն է, որ Հայ ազգային կոնգրեսը նրանց ցուցակից դուրս է մնացել»,- ասաց սոցիոլոգը:
Հիշեցնենք, որ հանրային կարծիքի ուսումնասիրության համառուսաստանյան կենտրոնի (ВЦИОМ)՝ «Եթե ընտրությունները լինեին այս կիրակի, ո՞ր կուսակցությանը կընտրեիք» ավանդական հարցին հարցվածների 32%-ը պատասխանել է հօգուտ ՀՀԿ-ի, 27-%-ը՝ ԲՀԿ-ի, 5%-ը՝ ՕԵԿ-ի, 4-ական տոկոսը՝ «Ժառանգության» և ՀՅԴ-ի, 3%-ը՝ Հայ ազգային կոնգրես ընդդիմադիր դաշինքի և 2%-ը՝ Հայաստանի կոմունիստական կուսակցության։
