Իշխանական թեկնածուի կողմից գումար է բաժանվում: Այս մասին այսօր «Առաջին լրատվական»-ի հետ զրույցում ևս մեկ անգամ հաստատեց «168 ժամ» օրաթերթի գլխավոր խմբագիր, Արաբկիրի թիվ 4 ընտրատարածքի պատգամավորության թեկնածու Սաթիկ Սեյրանյանը` անդրադառնալով իր ընտրատարածքում տեղի ունեցող խախտումներին:
Նա նշեց, որ բազմիցս ասել է՝ ընտրացուցակներն ուսումնասիրելիս մեծ թվով կեղծ ընտրողներ են հայտնաբերել և փորձում են հասկանալ նաև, թե գումարը ինչպես պետք է գործի դրվի: Թեև, ըստ նրա, արդեն իսկ գումար բաժանվում է: Հարցին՝ ո՞ր թեկնածուի կողմից, պատասխանեց՝ իշխանական: «Ընդդիմադիր թեկնածուները նորմալ մարդիկ են, ինչո՞ւ պետք է նման բան անեն: Մենք փաստեր ենք արձանագրել, և ես ասել եմ, որ իմ հետագա քայլերի մասին մամլո ասուլիս հրավիրելով տեղյակ կպահեմ»,- հստակեցրեց Ս. Սեյրանյանը:
Անդրադառնալով իր նախընտրական քարոզարշավին` ասաց, որ նախընտրական քարոզչությունն իր հունով ընթանում է: Նա նշեց, որ շարունակում է հանդիպումները բնակիչների հետ:
Հիշեցնենք, որ նույն ընտրատարածքում առաջադրված են ԱԺ «Ժառանգություն» խմբակցության պատգամավոր Զարուհի Փոստանջյանը, ՀՀՇ վարչության նախագահ Արամ Մանուկյանը և ՀՀԿ ներկայացուցիչ Արտակ Սարգսյանը: