Իսրայելի կողմից Իրանի ռմբակոծումը կլինի աններելի և անհիմն արարք, քանի որ Վաշինգտոնը Թել Ավիվին տրամադրել է անվտանգության բոլոր անհրաժեշտ երաշխիքները: Այս մասին հայտարարել է ԱՄՆ նախագահի ազգային անվտանգության հարցերով նախկին խորհրդական Ջեյմս Ջոնսը:
«ԱՄՆ-ի կողմից Իսրայելին ներկայացվել են շատ համոզիչ հավաստիացումներ իրենց անվտանգության հարցում, և ես չեմ կարծում, որ Միացյալ Նահանգները պետք է ներողություն խնդրի ինչ-որ բանի համար, որը կարող է տեղի ունենալ»,- ասել է Ջոնսը՝ Washington Times-ին տված հարցազրույցի ժամանակ:
Ջոնսը 2009-2010 թթ եղել է Բարաք Օբամայի անվտանգության հարցերով խորհրդականը:
Այն հարցին, թե արդյո՞ք ԱՄՆ-ը կարող է ուժ կիրառել Իրանի դեմ, նա փաստացիորեն բացասական պատասխան է տվել։ Ջոնսը նշել է, որ Իրանի դեմ կիրառվող պատժամիջոցները դրական արդյունքներ են բերում:
ԱՄՆ-ը, Իսրայելը և մի շարք այլ երկրներ Իրանին կասկածում են միջուկային զենք մշակելու մեջ: Իսկ Թեհրանը մերժում է այդ մեղադրանքները` ասելով որ միջուկային ծրագիրն ուղղված է բնակչության էլեկտրաէներգիայի պահանջները բավարարելուն:
Ապրիլի 19-ին Իսրայելի առաջնորդները երդվել են թույլ չտալ, որպեսզի Իրանի մոտ միջուկային զենք հայտնվի` կոչելով այն «սպառնալիք հրեական պետության համար»:
