Թիվ 2 ընտրատարածքում մեծամասնականով ՀՀԿ կողմից առաջադրված թեկնածու Սամվել Ֆարմանյանն Ֆեյսբուքի իր էջում հայտարարել է, թե պատրաստ է իր մրցակցի` Վլադիմիր Կարապետյանի հետ բանավեճին:
«Քարոզարշավն այսօր կիսվում է: Որպես պատգամավորության թեկնածու, ընդհանուր առմամբ գոհ եմ մինչ այս պահը Նոր Նորքի N 2 ընտրատարածքում քարոզարշավի ընթացքից: Շարունակում եմ հավատալ, որ քաղաքակիրթ ընտրապայքարի առումով մեր ընտրատարածքը կարող է լինել օրինակելիներից մեկը ողջ երկրում:
Ափսոսում եմ, որ Չեմպիոնների լիգայի կիսաեզրափակիչ հանդիպումները միասին դիտելու՝ նախորդ շաբաթ արված իմ պարզ առաջարկը, մրցակցիս կողմից չընդունվեց՝ որպես հիմնավորում ներկայացնելով նախատեսված հեռուստաբանավեճի առավել անհրաժեշտությունը: Իհարկե, հեռու եմ այն մտքից, որ պարոն Կարապետյանը ճիշտ չի ընկալել իմ առաջարկի իմաստը, որը գալիս էր ոչ թե փոխարինելու հեռուստատեսային եթերում բանավեճի գաղափարը (իմիջիայլոց, ես գրեթե ամեն օր այս կամ այն կերպ ստիպված կրկնում եմ, որ ԸՆԴՈւՆԵԼ եմ բանավեճի առաջարկը, և ինձ համար, իրոք, տարօրինակ է, որ պարոն Կարապետյանն ամեն օր հայտարարում է, թե ինքը սպասում է իմ արձագանքին), այլ փոխլրացնելու և հարստացնելու այն: Ինչպես երեկ՝ Հ2-ի եթերում, այնպես էլ այսօր կրկնեմ, որ ես տվել եմ իմ համաձայնությունը Արտակ Ալեքսանյանի առաջարկությանը՝ ապրիլի 26-ին, մրցակցիս հետ միասին, որպես թիվ 2 ընտրատարածքում մեծամասնական ընտրակարգով առաջադրված թեկնածուներ, հյուրընկալվելու «Արմնյուզի» ուղիղ եթերում:
Մինչ այդ, թեև Վ. Կարապետյանի կողմից ցայսօր դրսևորած խուսափողական կեցվածքին, իր ու իր նեղ թիմակիցների կողմից գործադրվող սև քարոզչությունն ու վիրավորական ակնարկները լավատեսության մեծ հիմքեր չեն տալիս: Ես, հավատարիմ քաղաքակիրթ և օրինակելի ընտրապայքար ծավալելու իմ առաջնային հանձնառությանը, մրցակից թեկնածուիս առաջարկում եմ՝ ապրիլի 24-ին միասին առաջնորդելու Նոր Նորք համայնքի մեր աջակիցների երթը Ծիծեռնակաբերդ՝ միասին խնկարկելու Ցեղասպանության զոհերի հիշատակը:
Վստահ եմ՝ մենք կարող ենք և նույնիսկ պարտավոր ենք վեր կանգնել պահի՝ թելադրող քաղաքական մշակույթի իներցիայից, դրսևորել պատասխանատվություն և ապացուցել, որ մենք տարբեր ենք…»,- գրել է Սամվել Ֆարմանյանը:
