Ուկրաինայի միավորված ընդդիմությունը պետք է հաղթի 2012թ. աշնանը նախատեսվող խորհրդարանական ընտրություններում, իսկ դրանից հետո սկսի նախագահ Վիկտոր Յանուկովիչին իմփիչմենթ հայտարարելու գոծընթացը: Այս մասին «Զերկալո նեդելի. Ուկրաինա» թերթին տված հարցազրույցում ասել է ազատազրկման մեջ գտնվող Ուկրաինայի նախկին վարչապետ Յուլյա Տիմոշենկոն:
Հարցերը Տիմոշենկոյին ներկայացվել են գրավոր, նույն եղանակով էլ ստացվել են պատասխանները:
«Իրական փոփոխությունների հասնելու առաջին քայլը Յանուկովիչին իմփիչմենթ հայտարարելն է խորհրդարանական ընտրություններում ընդդիմության հաղթանակից անմիջապես հետո»,- ասել է Տիմոշենկոն՝ պատասխանելով երկրի պետական կարգի և հնարավոր սահմանադրական փոփոխությունների մասին հարցին:
Նախկին վարչապետի խոսքերով՝ ընտրություններից առաջ ընդդիմությունը պարտավոր է միավորվել, քանի որ միայն այդ դեպքում է հնարավոր հաղթել գործող իշխանություններին:
Ուկրաինայում խորհրդարանական ընտրությունները տեղի կունենան հոկտեմբերին: Ինքը՝ Տիմոշենկոն, այսօրվա դրությամբ իրավունք չունի մասնակցել ընտրություններին, քանի որ դատապարտված է 7 տարվա ազատազրկման՝ 2009թ. Ռուսաստանի հետ գազի շուրջ կնքվող պայմանագրի ժամանակ պաշտոնական դիրքի չարաշահման համար:
