Ինչպես հայտնում է RTL ռադիոընկերությունը, Ֆրանսիայի նախագահ Նիկոլա Սարկոզին երկրի նախագահ վերընտրվելու դեպքում խոստացել է վարել ագրեսիվ միջազգային քաղաքականություն: «Ես մինչև 2012թ. վերջը հանդես եմ գալու միջազգային մակարդակի վճռական նախաձեռնություններով, բացի այդ` կանցկացնեմ 3-4 զանգվածային բարեփոխումներ երկրի ներսում»,- ասել է Սարկոզին:
Նրա խոսքով` իր մանդատի հենց սկզբում «թույլ է տվել, հնարավոր է, մեկ սխալ»: «Ես ոչ միանգամից գիտակցեցի նախագահի դերի ողջ նշանակությունն ու այդ պատճառով չաշխատեցի ամբողջ ուժով»,- ասել է Սարկոզին, սակայն խոստացել է երկրում նախագահ վերընտրվելու դեպքում նման բան իրեն թույլ չտալ:
«Դա տեղի չի ունենա, քանի որ ես հիմա շատ լավ գիտեմ աշխատանքս ու պարտականություններս»,- ասել է Ֆրանսիայի նախագահը: Այս մասին հաղորդում է ITAR-TASS գործակալությունը:
Նա նաև համոզմունք է հայտնել, որ «ներկայում այլևս գոյություն չունի եվրոյի կրախի ռիսկ»:
«Եվրոպան հիմա հիշեցնում է առողջացող հիվանդի, ու մենք սխալվելու իրավունք չունենք: Եթե ֆրանսիական իշխանությունները թուլացնեն պետական խասերի դեմ պայքարը, պետբյուջեի դեֆիցիտի ու պետպարտքի կրճատումը, Ֆրանսիան կհայտնվի այն նույն վիճակում, ինչ Իսպանիան»,- ասել է Սարկոզին:
Հիշեցնենք, որ Ֆրանսիայում արդեն ավարտվում է նախընտրական քարոզչությանը հատկացված ժամանակը հանրահավաքներ կազմակերպելու, ԶԼՄ-ների առաջ ելույթ ունենալու համար, ընտրողները կիրակի կկատարեն իրենց ընտրությունը:
Ֆրանսիայի նախագահի պաշտոնին հավակնում էմ 10 թեկնածու` երկրի ներկայիս նախագահ Նիկոլա Սարկոզին, Սոցիալիստական կուսակցության առաջնորդ Ֆրանսուա Օլանդը, «Ազգային ճակատ» կուսակցության ղեկավար Մարին Լե Պենը, «Աջ ճակատից» Ժան-Լյուկ Մելանշոնը, «Դեմոկրատական շարժում» կուսակցության նախագահ Ֆրանսուա Բայրուն, «Եվրոպա Էկոլոգիա-Կանաչներ» կուսակցությունից Եվա Ժոլին, «Կանգնի՛ր, հանրապետություն» կուսակցության առաջնորդ Նիկոլա Դյուպոն-Էնյանը, աջ «Նոր հակակապիտալիստական կուսակցության ղեկավար Ֆիլիպ Պուտուն, տրոցկիստական-կոմունիստական «Աշխատանքային պայքար» կուսակցության նախագահ Նատալի Արտոն և «Համերաշխություն ու առաջընթաց» կուսակցության հիմանդիր Ժակ Շեմինադը: Այս մասին հայտնում է RIA Novosti գործակալությունը:
Ֆրանսիայի նախագահական ընտրությունները տեղի կունենան երկու փուլով, որոնցից առաջինը կկայանա ապրիլի 22-ին, հաջորդը`մայիսի 6-ին:
