Թուրքական Dünya Bülteni կայքի փոխանցմամբ՝ ամերիկյան ղեկավարությունը չի աջակցել Սիրիայի հետ կապված ՆԱՏՕ-ին հղած Թուրքիայի դիմումին: Պենտագոնի ղեկավար Լեոն Պանետան մասնակցել է ԱՄՆ Կոնգրեսի Ներկայացուցիչների պալատի սպառազինության հարցերով կոմիտեում Սիրիայի վերաբերյալ կազմակերպված նիստին:
Այստեղ Պանետան պատասխանել է Սիրիայի բանակի կողմից Թուրքիայի տարածքի գնդակոծման դեպքում ՆԱՏՕ-ի կանոնադրության 5-րդ հոդվածից օգտվելու հարցին, որում նշված է, որ ՆԱՏՕ-ի անդամ երկրներից մեկի դեմ ագրեսիան համարվում է ագրեսիա ողջ ՆԱՏՕ-ի դեմ.
«Կարծում եմ, որ տվյալ փուլում դժվար կլինի դա անել: Դրա համար Սիրիան պետք է ուղղակի սպառնալիք ներկայացնի Թուրքիային: ՆԱՏՕ-ի կանոնադրության 5-րդ հոդվածը գործի է դրվել միայն մեկ անգամ՝ սեպտեմբերի 11-ի հարձակումներից հետո»:
Միևնույն ժամանակ, ամերիկյան Foreign Policy պարբերականը գրում է, որ Վաշինգտոնը կուլիսների հետևում նոր ուղիներ է որոնում Սիրիայի նախագահ Բաշար Ասադին գահընկեց անելու համար: Այդ պլանում առաջ է քաշվում Սիրիայում բուֆերային գոտիներ ձևավորելու հարցը, ինչը պետք է արվի Թուրքիայի և Պարսից ծոցի երկրների ֆինանսական ու ռազմական աջակցությամբ:
