Ֆրանս Տելեկոմ-Orange Խմբի հաղորդակցության և բարեգործության գծով գործադիր փոխտնօրեն Քրիստին Ալբանելը, որն առաջին անգամ է Հայաստանում և ժամանել է Orange Հիմնադրամի ստեղծման առաջին տարեդարձի առթիվ, այսօր հանդիպում ունեցավ հայ լրագրողների հետ:
« Երջանիկ եմ լինել Հայաստանում Orange Հիմնադրամի հայկական գրասենյակի ստեղծման առաջին տարեդարձի առթիվ: Orange ապրանքանիշի ներքո Ֆրանս Տելեկոմը գործունեություն է ծավալում 35 երկրում, սակայն մինչ օրս դրանց միայն կեսում է ստեղծել հիմնադրամներ, չնայած բարեգործական գործունեություն ծավալում է բոլոր երկրներում: Սա արտացոլում է մեր նվիրվածությունն այն երկրին, որտեղ բիզնես գործունեություն ենք ծավալում: Ուրախ եմ տեսնել կատարված աշխատանքը և այն աջակցությունը, որ հիմնադրամը կարողանում է իր մեծ ու փոքր ծրագրերով ցուցաբերել երկրին` մասնավորապես հեռավոր և խոցելի համայնքներին, հաղորդակցության խնդիրներ ունեցող անձանց, ուսանողներին», ասաց Քրիստին Ալբանելը:
Քրիստին Ալբանելը նաև ներկայացրեց Orange բրենդի արժեքներն ու Orange-ի առաքելությունն աշխարհում, ինչպես նաև Հայաստանում: Խոսելով ապրանքանիշի արժեքի մասին` նա նշեց, որ Orange-ն աշխարհի ամենաթանկ ապրանքանիշերի շարքում 36-րդն է, և այս արժեքի կերտմանն ու մեծացման համար իրենց ներդրումն են ունենում Խմբի բոլոր աշխատակիցները իրենց ամենօրյա նվիրված աշխատանքով:
«Մենք աշխատում ենք տարբեր երկրներում, տարբեր մայրցամաքներում, զարգացման տարբեր աստիճաններ և մշակույթ ունեցող երկրներում, սակայն կա մի բան, որ միավորում է բոլոր Orange ընկերություններին` դա մեր առաքելությունն է: Հեռահաղորդակցությունը մի ոլորտ է, որը փոխում է մարդկանց ամենօրյա կյանքը. փոխում է, թե ինչպես են մարդիկ հաղորդակցվում, ինչպես են ապրում, ինչպես են սովորում: Orange-ում մենք ցանկանում ենք ուղեկցել մեր բաժանորդներին թվային աշխարհում, դառնալ նրանց ամենօրյա օգնականը: Իսկ շուկայի վերջին ուսումնասիրությունները ցույց են տալիս, որ Հայաստանում հարցվողների մեծամասնությունը նշել է Orange-ը որպես ամենահոգատար ընկերություն, որն ունի ամենահասկանալի առաջարկները, մինչդեռ սովորաբար հեռահաղորդակցության ծառայությունները շատերի համար բարդ են լինում: Սա նշան է, որ մենք ճիշտ ճանապարհին ենք», հավելեց Քրիստին Ալբանելը:
Առավոտյան Քրիստին Ալբանելը հանդիպել էր ՀՀ Նախագահի աշխատակազմի ղեկավար Վիգեն Սարգսյանի և Հայաստանում Ֆրանսիայի դեսպանի հետ, ինչպես նաև կայցելի Orange Հիմնադրամի իրականացրած նախագծերից մի քանիսի շահառուներին` ծանոթանալու հիմնադրամի աջակցությամբ կատարված աշխատանքին: