Քաղաքագետ Երվանդ Բոզոյանի մեկնաբանությամբ՝ ընտրական պայքարը բավականին հանգիստ է, չկա ատելության և անհանդուրժողականության մթնոլորտ, ինչը դրական երևույթ է:
«Ընտրությունների փուլում բացասականն այն է, որ հասարակությունը լավ չի կարողանում կողմնորոշվել՝ ով ով է: Կուսակցություններից մի քանիսի ծրագրերը լավն են, բայց ճիշտ չեն կարողանում օգտագործել»,- լրագրողների հետ հանդիպմանը նկատեց քաղաքագետը:
Նա նշեց նաև, որ ընտրական քարոզարշավները հեռուստատեսությամբ նույնպես օբյեկտիվ են լուսաբանվում: Ինչ վերաբերում է այս շրջանում իրականացվող սոցհարցումներին, պրն Բոզոյանի կարծիքով՝ ըստ էության դա քարոզչական զենքերից մեկն է:
«Հայաստանում դրանք ֆոնային և PR ակցիայի դեր են կատարում, սոցհարցմանը մեր հասարակության մեծ մասը չի հավատում: Երբ ընտրությունները թափանցիկ անցկացվեն, այդ ժամանակ էլ կխոսենք օբյեկտիվ սոցիոլոգիական դպրոցի մասին»:
Քաղաքագետի կարծիքով՝ բարեգործություններ լինում են բոլոր երկրներում, սակայն կայացած երկրներում դրանք չեն էլ նկատվում, իսկ անցումային տիպի երկրներում բարեգործության դերը շատ մեծ է, մանավանդ, որ մեր հասարակության սոցիալական վիճակը շատ ծանր է:
«Մարդիկ հանապազօրյա հացի կարիք ունեն. դա է մեր հասարակության օբյեկտիվ պատկերը: Եթե ապրեինք Ֆրանսիայում, ես կասեի՝ ինչ վատ բան եք անում, ամոթ ձեզ, բայց մեր պարագայում այդպես չէ: Սակայն պետք է դա գռեհիկ՝ 5000-10000-ի կամ մուրաբայի մակարդակի չհասնի»:
Վերջում բանախոսն ավելացրեց, որ քարոզարշավը հոգնած բնույթ ունի`ընդգծելով, որ անցումային փուլում գտնվող երկրների համար պետական մեքենան փորձում է իր օգտին ծառայեցնել ընտրությունները. «Եթե կուսակցական դաշտը կարողանա հակակշիռներ ստեղծել, քաղաքական դաշտը կվերահսկվի»:
