Եվրոպայի խորհրդի մարդու իրավունքների հանձնակատար Թոմաս Համարբերգը Հայաստան կատարած այցի ընթացքում անդրադարձել է մեր երկրում բանակում մարդու իրավունքներին վերաբերող հարցերին: «Առաջին լրատվականը» ԱԱԾ նախկին փոխնախարար, Հայ ազգային կոնգրեսի անդամ Գուրգեն Եղիազարյանից հետաքրքրվեց, թե արդյո՞ք բանակի խնդիրները եվրոպական կառույցներում արծարծելը չի առնչվում ՀՀ-ի անվտանգությանը, եթե նկատի ունենանք, որ մենք չլուծված խնդիրներ ունենք հարևան հանրապետության հետ: «Բազմիցս մենք բարձրաձայնել ենք բանակում տիրող իրավիճակի, մարդու իրավունքների ոտնահարման փաստերի մասին: Խայտառակ վիճակ է տիրում: Ընդամենը պետք է, որ բարձրագույն սպայակազմը թողնի իր բիզնեսը և զբաղվի իր գործով: Նա պետք է ընտրությու ն կատարի` կա՛մ բիզնեսը, կա՛մ բանակը: Չի կարող լինել, որ բիզնեսմենը լինի գեներալ, գեներալ-մայոր, գեներալ-լեյտենանտ, գեներալ-գնդապետ: Բիզնեսմենը չի կարող լինել գնդապետ կամ փոխգնդապետ: Երբ այդ երկուսը համատեղվում են, սկսվում են այլանդակությունները բանակում: Զինվորները այդ դեպքում սկսում են վարվել այնպես, ինչպես կալանավայրերում, օգտագործել կալանավայրերի խոսակցականը: Ինչ վերաբերում է այն բանին, որ եվրոպական կառույցներում արծարծում են բանակում մարդու իրավունքների խնդիրը, ապա դրանք միայն բանակին չեն վերաբերում: Իսկ բանակում սպանությունները ակնառու են»,- ասաց Գուրգեն Եղիազարյանը: