Նորմալ է, երբ լրագրողները մուտք են գործում ԱԺ և առկա խնդիրների մասին բարձրաձայնում ոչ թե մամուլում, այլ խորհրդարանական ամբիոնից: Քաղաքական և միջազգային հետազոտությունների հայկական կենտրոնի՝ այսօր կազմակերպած քաղաքական բանավեճի ժամանակ այս մասին ասաց թիվ 12 ընտրատարածքում մեծամասնական ընտրակարգով պատգամավորության թեկնածու առաջադրված, «Չորրորդ ինքնիշխանություն» թերթի լրագրող Գոհար Վեզիրյանը:
«Լրագրողն ԱԺ գնում է քաղաքացիների միջից և իր դեմքը երբեք չի փոխում: Լավագույն օրինակը ԲՀԿ պատգամավոր, նախկին լրագրող Նաիրա Զոհրաբյանն է, ով, կհամաձայնեք, իսկապես լավ է աշխատում: Այնպես որ, նորմալ է, երբ լրագրողը խորհրդարանում հայտնվելու հավակնություն է ներկայացնում»,- ասաց նա:
Վեզիրյանը նաև հավելեց, որ տասը տարի անց ինքը բանավիճելու է գալու որպես նախագահի թեկնածու: «Այսօր ինձ հետևող երիտասարդների թիմը հասնելու է փոփոխությունների»,- համոզմունք հայտնեց պատգամավորության անկուսակցական թեկնածուն:
Քննարկմանը ներկա մյուս բանախոս` Վեզիրյանի մրցակից, «Ժառանգություն» կուսակցության պատգամավոր Անահիտ Բախշյանն իր հերթին նկատեց, որ ԱԺ պետք է անցնեն այն ուժերը, որոնք կարող են հաղթահարել սահմանված տոկոսը: «Թեպետ մենք ԱԺ-ում ընդամենը 6 հոգի ենք, սակայն ամենաշատ հարցեր տվողները հենց ժառանգական պատգամավորներն են եղել»:
