Հունվարի 22-ին աշխատանքային այցով Հայաստան էր ժամանել Վրաստանի նախագահ Միխեիլ Սաակաշվիլին: Վերջինիս այցելության և Սերժ Սարգսյանի հետ հանդիպման օրակարգում եղել են հումանիտար ոլորտում փոխգործակցության, հայ-վրացական սահմանի հատման, տնտեսական համագործակցության զարգացման ճանապարհին արհեստականորեն ստեղծվող բյուրոկրատական խոչընդոտների վերացման հարցերը: Ինչպես տեղեկացնում է ՀՀ նախագահի մամլո գրասենյակը` Սարգսյանն ու Սաակաշվիլին անդրադարձել են նաև փոխադարձ հետաքրքրություն ներկայացնող տարածաշրջանային և միջազգային խնդիրների:
Նախագահները միաժամանակ այցելել են «Սինոփսիս Արմենիա» ընկերության Երևանի գիտաարտադրական կենտրոն, որտեղ հայ-վրացական դպրոցական օլիմպիադայի մասնակիցների համար Սերժ Սարգսյան մի ոգեշունչ ելույթ է ունեցել` խոսքի հիմքում դնելով մրցակցության վրա հիմնված հայ-վրացական բարեկամությունը: ՀՀ նախագահի կայքում տեղադրված Սարգսյանի խոսքը վերընթերցելով` հակվում ես մտածելու, որ կազմելուց առաջ հեղինակները ելույթի պարունակությունը լցնելու նպատակով մի երկու անգամ վերադիտել են հայտնի «Միմինո» ֆիլմը:
Թե ինչ օգուտ կբերի այս այցը երկու երկրներին՝ ժամանակը ցույց կտա: Սակայն Սերժ Սարգսյանին հաստատ որևէ լավ բան այն չի խոստանում: Այսպես, հայերի ու վրացիների մրցակցության գաղափարի վրա սևեռված լինելով` ՀՀ նախագահի աթոռը զբաղեցնող անձը Բաղրամյան 26-ում մի օր կարող է արթնանալ իրեն այցելած ՀՀ քաղաքացիների ձայներից, ովքեր երկու վարդ կարող են նվիրել նրան` ի հաստատումն հայ-վրացական դարավոր մրցակցության:
Հումանիտար ոլորտում երկու երկրների մրցակցությունը նույնպես Սարգսյանի համար խոստումնալից չէ: Մարդկային կապիտալի շարժ արդեն իսկ նկատելի է: Այսպես, Երևանի քաղաքապետարանի մոտ փողոցային առևտրականների բողոքի ակցիան ցրելու ժամանակ վերջիններս հասցրել են տեղեկացնել. «Վաղն այստեղ է լինելու Վրաստանի նախագահը, մենք նրան կխնդրենք աշխատանք տալ մեզ իր երկրում, քանի որ այստեղ թույլ չեն տալիս աշխատել»: Փողոցային առևտրով զբաղվող քաղաքացիները, հավանաբար, նման որոշում են կայացրել` հետևելով Վրաստանի նախագահի հայտարարությանը, որով վերջինս, 2010 թ. կես միլիոն ՀՀ քաղաքացիների՝ Վրաստան այցելելու փաստը ներկայացնելով, Հայաստանի և Վրաստանի երիտասարդությանը կոչ էր անում չլքել երկիրը, մնալ հայրենիքում և զարգացնել այն: Մի խոսքով, էստի համեցեք, մնացեք ու զարգացեք ձեր հարազատ երկիր Վրաստանում:
Բյուրոկրատական խոչընդոտների վերացման հարցում ևս մրցակցությունը անհույս է Սերժ Սարգսյանի համար: Այդ դեպքում վերջինս ստիպված պետք է լինի զրկվել միլլիոնավոր դոլարների եկամուտից, իսկ առանձին դեպքերում՝ իր դեմ հանել երկրի պաշտոնեությանը: Դե, իսկ տարածաշրջանային և միջազգային խնդիրների հարցում մրցությունը կարծես թե դառնում է մրցություն ԱՄՆ-ի և Ռուսաստանի միջև, որտեղ վերջինիս հնարավորությունների ու դիրքերի մասին «մեր մեջ խոսելն էլ ամոթ ա»:
Լուսանկարը՝ PanArmenianPhoto-ի