Եգիպտոսում սկանդալ է բռնկվել՝ կապված երկրի Գերագույն մուֆթի Ալի Գումաայի՝ Երուսաղեմ կատարած այցի հետ: Երկրի ամենահեղինակավոր հոգևոր առաջնորդի այցը Իսրայել առաջացրել է իսլամական ուղղությունների և շարժումների խիստ զայրույթը, որոնցից շատերը պահանջել են նրանից ամիջապես հրաժարական տալ:
Ինչպես հաղորդում է ITAR-TASS-ը, Երուսաղեմ կատարած այցի մասին Twitter-ի իր միկրոբլոգում հայտնել էր ինքը՝ Գումաան՝ նշելով, որ դա իր առաջին այցն է: Նա գրել էր, որ Երուսաղեմ է մտել Հորդանան գետի Արևմտյան ափից՝ Հաշիմյան թագավորության տարածքով և այցելել է Ալ-Ակսա համալիր, որը համարվում է Մեքքայից և ՄԵդինայից հետո երրորդ իսլամական սրբավայրը:
Այդ մասին իմանալով՝ սալաֆիներն անմիջապես պահանջել են մուֆթիից հրաժարական տալ: «Այդ այցը խոր բիծ է Ալ-Ազհարի ճակատին»,- հայտարարարել է սալաֆիական ուղղության ներկայացուցիչներից մեկը՝ ավելացնելով որ իրենք կհասնեն Գումաայի հրաժարականին խորհրդարանում «Ալ-Նուր» կուսակցության իրենց պատգամավորների միջոցով:
Այդ կապակցությամբ խորհրդարանում սալաֆիների լիազոր ներակայացուցիչ Աշրաֆ Սաբեթը հայտարարել է, որ Ժողովրդական ժողովը լիազորված չէ նման որոշումներ կայացնելու մուֆթիի նկատմամբ: Ավելին, մուֆթիի այցից հետո Facebook և Twitter սոցիալական ցանցերում հայտնվել են «Ալ-Նուր»-ի անդամների լուսանկարներ, որոնք, պարզվել է, նույնպես այցելել են Երուսաղեմ:
Մուֆթիի պաշտպանությամբ հանդես է եկել Ալ-Ազհարի իմամ Ահմեդ Ալ-Տայյիբը: Նրա խոսքերով՝ «շարիաթով արգելված չեն Երուսաղեմ այցելությունները»: «Մուֆթին սրբազան քաղաքում եղել է մասնավոր այցի ընթացքում,- ասել է նա:- Եվ քանի որ դա արվել է անձնական շարհերից ելելով՝ Ալ-Ազհարը դա արգելելու պատճառ չի տեսնում»:
Ալի Գումաայի հասարակության հետ կապերի օգնականն էլ պարզաբանել է, որ մուֆթին Երուսաղեմ է այցելել Հորդանանի թագավորության պատվիրակության կազմում, որն իրավունք ունի մտնել Արևմտյան ափի տարածք առանց այցագրի: Նա ընգծել է, որ մուֆթիի այցելությունն ամենևին չի նշանակում «սիոնիստական պետության ճանաչում»:
Արևելյան Երուսաղեմն Իսրայելի կողմից օկուպացվել է 1967 թ.: Մինչ այժմ նրա կարգավիճակի հարցը պաղեստինա-իսրայելական հարաբերությունների ամենաառանցքային հարցերից մեկն է, քանի որ պաղեստինցիները Արևելյան Երուսաղեմը համարում են իրենց մայրաքաղաքը, իսկ Իսրայելն իր հերթին հայտարարում է, որ Երուսաղեմը իր միասնական և անբաժան մայրաքաղաքն է:
