ՆԱՏՕ-ի գլխավոր քարտուղար Ֆոգ Ռասմուսենը խոստացել է մանրակրկիտ հետաքննություն անցկացնել Աֆղանստանում ամերիկյան զինծառայողների` սպանված գրոհայինների մարմնի մասերի հետ լուսանկարվելու հետ կապված միջադեպի կապակցությամբ: Այդ լուսանկարներն այսօր հրապարակվել են Los Angeles Times թերթում:
Այդ լուսանկարները «պետք է մանրակրկիտ հետաքննվեն», ընդգծել է դաշինքի գլխավոր քարտուղարը: «Կձեռնարկվեն բոլոր անհրաժեշտ քայլերը, որպեսզի մեղավորները պատասխանատվության ենթարկվեն»,-նշել է նա: «Ես խստորեն դատապարտում եմ այդ լուսանկարները և ուզում եմ ընդգծել, որ դրանք չեն արտացոլում այն սկզբունքները և արժեքները, որոնք Աֆղանստանում մեր առաքելության հիմքն են»,- հավելել է Ռասմուսենը:
Ըստ դաշինքի ղեկավարի՝ խոսքը «մասնավոր միջադեպի մասին է», որն, ամենայն հավանականությամբ, տեղի է ունեցել մի քանի տարի առաջ: Միաժամանակ Անդերս Ֆոգ Ռասմուսենն ընդգծել է, որ նման լուսանկարների հրապարակումը չպետք է ազդի ՆԱՏՕ-ի և«աֆղանական ժողովրդի ու ազգային անվտանգության ուժերի» հարաբերությունների վրա:
Ավելի վաղ ԱՄՆ պաշտպանության նախարար Լեոն Պանետտան քննադատել էր ամերիկյան զինծառայողների գործողությունները: Այդ մասին հաղորդում է Agence France-Presse-ը: Միաժամանակ նա ափսոսանք էր հայտնել, որ Los Angeles Times–ը հրապարակել է այդ լուսանկարները` չնայած Պենտագոնի չհրապարակելու խնդրանքին: Պանետտան, ինչպես հստակեցրել է նրա մամլո քարտուղարը, անհանգստանում է, որ լուսանկարները կարող են օգտագործվել հակաամերիկյան ելույթներ սադրելու նպատակով
Հիշեցնենք, որ Los Angeles Times-ն այսօր հրապարակել է 2010 թվականի լուսանկարներ, որտեղ ամերիկյան զինծառայողները լուսանկարվել են սպանված գրոհայինների մարմնի մասերի հետ:
