Կրթական համակարգում կոռուպցիոն երևույթների դեմ պայքարի 2011-2012 թվականների միջոցառումներն իրականացնելիս Հայաստանը համագործակցելու է միջազգային կառույցների հետ: Մասնավորապես, ՀՀ կրթության և գիտության նախարարի տեղակալ Կարինե Հարությունյանի և ԱՄՆ միջազգային զարգացման գործակալության հակակոռուպցիոն գործողությունների մոբիլիզացման ծրագրի ղեկավար Ֆրանսուա Վեզինայի միջև պայմանավորվածություն է ձեռք բերվել՝ համագործակցելու բարձրագույն ուսումնական հաստատությունների հակակոռուպցիոն ռազմավարական ծրագրերի մշակման ու իրականացման գործընթացում: Ֆ. Վեզինան նշել է, որ ծրագիրը նախատեսում է կազմակերպել կոնֆերանս-սեմինար միջազգային փորձագետների մասնակցությամբ, որի ընթացքում կներկայացվեն կոռուպցիոն երևույթների դեմ պայքարում միջազգային սկզբունքները և փորձը, անդրադարձ կկատարվի հայաստանյան խնդիրներին և կքննարկվեն հակակոռուպցիոն միջոցառումներում հասարակության հնարավորինս լայն շրջանակների ընդգրկման խնդիրները։
Կ. Հարությունյանն էլ կարևորել է կոռուպցիայի դեմ պայքարի միջոցառումներում հասարակական կազմակերպությունների և ուսանողների ներգրավվածությունը: Նշենք, որ ՀՀ ԿԳ նախարար Արմեն Աշոտյանի հրամանով 2011-2012 թվականների միջոցառումների վերաբերյալ հայաստանյան բուհերի կառավարման խորհուրդները հաստատելու են հակակոռուպցիոն միջոցառումների ծրագրեր, ինչպես նաև ընդունելու և հրապարակելու են տվյալ ծրագրերի շրջանակում կատարված աշխատանքների վերաբերյալ կիսամյակային հաշվետվությունները։
