ՀՅԴ Գերագույն մարմնի անդամ Արմեն Ռուստամյանը տրամաբանական որևէ պատճառ չի տեսնում, որը կարող է խոչընդոտել «Ժառանգությանը»՝ մասնակցելու Հանրային վերահսկողության շտաբի աշխատանքներին: Այս մասին նա ասաց շտաբի կառուցվածքի վերաբերյալ այսօր կայացած քննարկման ժամանակ:
«Ես համաձայն եմ, որ շտաբն արդեն իսկ պետք է ընտրախախտումների հետ կապված հայտարարություններ անի: Մնացած բոլոր հարցերը կարծես թե հստակեցված են, և արդեն պետք է անցնել աշխատանքի այն ռեժիմին, որի շուրջ պայմանավորվել ենք»,- ասաց Արմեն Ռուստամյանը:
Քննարկմանը ներկա Հմայակ Հովհաննիսյանն էլ չբացառեց, որ որոշ ժամանակ անց կարող են ընդառաջ գնալ «Ժառանգության» պահանջին և շտաբի աշխատանքների քննարկումներին հրավիրել դրա ստեղծման նախաձեռնությանը մասնակից քաղաքական ուժերի ղեկավարներին:
ԲՀԿ անդամ Վարդան Օսկանյանն էլ նկատեց, որ ԲՀԿ շտաբի ուշադրության կենտրոնում է լինելու այն, որ հասարակությունը այլընտրանքի հնարավորություն ունենա: Մինչ այժմ վստահության դեֆիցիտ է եղել:
«Մենք մեր աշխատանքով ցույց կտանք, որ շտաբի ստեղծումը ժամանակի հրամայականն է և ձևական բնույթ չի կրում: Այս ընտրությունները շատ կարևոր են մեր ժողովրդի համար: Չեմ ուզում թևաթափ լինել և ասել, որ ամեն ինչ ավարտված է: Ոչ, ամեն ինչ նոր է սկսվում»,- ասաց նա:
Օսկանյանը չցանկացավ մեկնաբանել, թե ինչու է Գագիկ Ծառուկյանը զենքով գնացել հանրահավաքի: «Ես դրա մեջ իսկապես մեծ բան չեմ տեսնում: Դա նրա իրավունքն է, նա որոշել է այդ օրը զենքով գնալ հանդիպման»:
Հարցին՝ ընտրակաշառք չի՞ համարում գյուղացիներին Ծառուկյանի կողմից բաժանվող տրակտորները, ԲՀԿ անդամը պատասխանեց, որ բարեգործական ակցիաներ նա արել է մշտապես: «Ես տեսնում ու քննադատում եմ այն, ինչ վատ է արվել»,- ասաց նա:
