Իրանական Mehr News լրատվական գործակալության փոխանցմամբ՝ Իրանի հետախուզության և ազգային անվտանգության նախարարությունը նոր մանրամասներ է ներկայացրել ապրիլի 10-ին իսրայելական լրտեսական ցանցի բացահայտման մասին:
Այդ օրն Իրանի հատուկ ծառայությունների իրականացրած օպերատիվ գործողությունների արդյունքում ձերբակալվել էր ավելի քան 15 մարդ, որոնք մեղադրվում են իսրայելական «Մոսսադ» հատուկ ծառայության օգտին աշխատանքներ տանելու մեջ:
Գործողություններից մեկի ժամանակ Իրանի հատուկ ծառայություններին հաջողվել է ձախողել իրանցի ատոմագետի դեմ պլանավորված սպանությունը: Մեկ այլ դեպքում կանխվել է Իրանի հիմնական ենթակառույցներից մեկի նկատմամբ խափանարար գործողությունը: Նշվում է, որ կանխվել է նաև փետրվարի 10-ին՝ Իսլամական հեղափոխության տարեդարձի օրը, պլանավորած ահաբեկչական ակտը:
Բացի այդ, իսրայելական հետախուզական բազա է հայտնաբերվել հարևան երկրում (ամենայն հավանականությամբ, նկատի է առնվում Ադրբեջանը.- 1in.am), որը «Մոսսադի» կողմից հաճախ է գործածվել հակաիրանական օպերացիաների համար: Այլ մանրամասներ չեն հաղորդվում անվտանգության նկատառումներով:
Հիշեցնենք, որ փետրվարի կեսերին The London Times-ը գրել էր, որ Իսրայելն օգտագործում է Ադրբեջանի տարածքը Իրանին լրտեսելու համար: Ի դեպ, WikiLeaks-յան գաղտնազերծված փաստաթղթերից մեկը վկայում է, որ Ադրբեջանի նախագահ Իլհամ Ալիևն ամերիկացի դիվանագետների հետ զրույցում հայտարարել էր, թե Ադրբեջանի և Իսրայելի հարաբերությունները նման են սառցաբեկորի, որի միայն 10 տոկոսն է տեսանելի, իսկ մնացած 90 թաքնված է կողմնակի հայացքից:
