Հանրապետականի շանսերը 34%-ից ավելի են: Այսօր «Առաջին լրատվական»-ի հետ զրույցում նման տեսակետ հայտնեց ԱԺ Հանրապետական խմբակցության պատգամավոր Արտակ Զաքարյանը` անդրադառնալով The Gallup Organization-ի իրականացրած հարցումներին, ըստ որոնց Հանրապետականը գալիք խորհրդարանական ընտրություններում կստանա ընտրողների 34%-ի ձայները:
Նա նշեց, որ այս նախընտրական շրջանում ամենատարբեր հարցումներ են իրականացվում: «Մենք ևս ունենք մեր ուսումնասիրությունները, որոնք պարբերաբար իրականացվում են հասարակական կարծիքը մեզ համար պարզելու համար: Կարծում եմ, որ Հանրապետական կուսակցության օգտին քվեարկողների թիվը երկրաչափական պրոգրեսիայով աճում է, որն ունի իր բազմաթիվ բացատրությունները, հիմնավորումները և դրդապատճառները: Հիմա կդժվարանամ ասել, թե Gallup-ի տվյալները ճիշտ են, թե ոչ: Ես Հանրապետականի պոտենցիալն ու շանսերը 34%-ից ավելի եմ գնահատում»,- մեկնաբանեց պատգամավորը:
Հիշեցնենք, որ միջազգային հեղինակավոր կազմակերպության հարցումների համաձայն՝ գրանցված ընտրողների 34%-ի ձայները կստանա Հանրապետական կուսակցությունը, իսկ 28-ը` ԲՀԿ-ն: 3 այլ կուսակցություն`ՀԱԿ, ՕԵԿ, ՀՅԴ, կստանան ավելի քիչ ձայներ, սակայն կանցնեն խորհրդարան:
