Ռազմական խունտան, որն իր վերահսկողությունն էր հաստատել Մալիում, ապրիլի 17-ին հայտարարել է երկրի անցումային վարչապետի անունը: Reuters գործակալության փոխանցմամբ` Մալիի վարչապետ է դարձել Շեիք Մոդիբո Դիարան` Microsoft ընկերության աֆրիկյան ստորաբաժանման ղեկավարը:
Նորությունն այն մասին, որ թոփ-մենեջերը, ով ավելի վաղ աշխատել է NASA-ում` որպես աստղաֆիզիկոս, դարձել է երկրի վարչապետ, հայտարարվել է տեղական հեռուստաալիքի ուղիղ եթերում:
Դիարան դեռևս ոչ մի կերպ չի մեկնաբանել իր նշանակումը և չի պատմել, թե ինչպես է պատրաստվում հանել երկիրը ճգնաժամից:
Հիշեցնենք, որ մարտի սկզբին մի խումբ երիտասարդ սպաներ և զինվորներ գրավել էին իշխանությունը Մալիում` դժգոհ լինելով ապստամբ տուարեգների դեմ ռազմական գործողությունների ընթացքից: Սակայն այս դեպքերից անմիջապես հետո բանակը դադարել էր դիմադրություն ցույց տալ տուարեգներին, որից հետո վերջիններս գրավել էին Մալիի հյուսիսը և հայտարարել էին այն անկախ պետություն` Ազավադ անվանումով։
Դրա հետ մեկտեղ Մալիի հարևան երկրները և Արևմուտքը չեն ընդունել ռազմական խունտայի իշխանությունը և պահանջել են իշխանությունը վերադարձնել քաղաքացիական կառավարությանը:
