Աֆղանստանի նախագահ Համիդ Քարզայը հայտարարել է, որ ԱՄՆ-ը պետք է իր կառավարությանը տրամադրի տարեկան առնվազն 2 մլրդ դոլար:
Ինչպես հաղորդում է Agence France-Presse-ը, ելույթ ունենալով Քաբուլի համալսարանում, պետության ղեկավարն ասել է. «Նրանք ասում են որ մեզ գումար կտան, բայց դրա չափը չեն նշում: Մենք պատասխանում ենք, որ համաձայն ենք նաև քիչ գումարի, բայց դրա չափը պետք է ամրագրվի պայմանագրով»: Նրա խոսքերով՝ 2014 թ. ամերիկացիների հեռանալուց հետո Աֆղանստանի անվտանգության ուժերին անհրաժեշտ կլինի տարեկան առնվազն 2 մլրդ դոլար: «Եթե ցանկանում եք ավելի շատ տալ, մենք դեմ չենք»,- ասել է նա:
Քարզայը նաև նշել է, որ չի ցանկանում, որպեսզի ամերիկացիներն Աֆղանստանում չափազանց շատ գումար ծախսեն: «Թող տնտեսեն, բայց և մեզ հետ կիսվեն»,- եզրափակել է պետության ղեկավարը:
Նշենք, որ Աֆղանստանի նախագահի հայտարարությունները հնչել են ԱՄՆ-ի և Աֆղանստանի միջև համագործակցության մասին երկկողմ պայմանագրի տեքստի շուրջ շարունակվող բանակցությունների ֆոնին:
2013 թ. ԱՄՆ բյուջեի նախագծով Քաբուլի համար առանձնացվում է 2.5 մլրդ դոլար: Այնուամենայնիվ, ԱՄՆ Կոնգրեսում դժգոհություններ են հնչում այդ կապակցությամբ:
