Մինչև մայիսի 1-ը ՀՀ քաղաքացիներն իրավունք ունեն ներկայանալ ոստիկանություն և ստուգել իրենց անվան առկայությունը ընտրացուցակներում: Ոստիկանության Անձնագրային և վիզաների վարչության պետ Հովհաննես Քոչարյանն այսօր լրագրողների հետ հանդիպմանը տեղեկացրեց, որ ընտրացուցակների ճշտման գործընթացը շարունակվում է, այս ընթացքում բավականին ակտիվացել են ընտրական շտաբները, տուն առ տուն այցելում են ընտրողներին և ներկայացնում այն անճշտությունները, որոնք ուղղման ենթակա են:
Նրա տվյալներով՝ ներկայում մահացած անձանց թիվը 2000-ով պակասել է, ևս 1000-ով պակասել է հաշվառումից դուրս եկածների թիվը: Ընտրացուցակներում երեկվա դրությամբ առկա է 2 մլն 482 հազար 593 ընտրողի անուն: ԱՎԾ թվերի հետ տարբերությունը ոստիկանության պաշտոնյան բացատրեց արտերկրում գտնվող ՀՀ քաղաքացիների առկայությամբ. «Արտերկրում գտնվողները հաշվառումից դուրս չեն գալիս, և այդ պատճառով ցուցանիշը տարբերվում է»:
Հ. Քոչարյանը հայտնեց, որ ներկայում ոստիկանությունը հրաժարվել է սեղմ ժամկետում վճարովի հիմունքներով անձնագիր տրամադրելուց: Այդ հանգամանքը նա բացատրեց պահանջարկի անկանխատեսելի աճով, քանի որ լրացել է անձնագրերի վավերականության ժամկետը, և բազմաթիվ քաղաքացիներ դիմում են անձնագիրը փոխելու համար: Մտցրել են նաև անձնագրերի Շենգենյան երկրներում վավերականության ժամկետի սահմանափակում, և մեկնող քաղաքացիների մոտ նույնպես պահանջարկն ավելացել է:
Ամեն դեպքում, ըստ նրա, անվավեր անձնագիրը ընտրությունների համար խոչընդոտ չէ, օգտագործման համար պիտանի է, և քաղաքացին դրանով կարող է մասնակցել ընտրություններին:
