Աթենքի դատարանը որոշում է կայացրել նախնական կալանք կիրառել երկրի ազգային պաշտպանության նախկին նախարար Ակիս Ցոխաձոպուլոսի նկատմամբ, որը մեղադրվում է կոռուպցիայի մեջ:
Վերջինս կալանավորվել էր ապրիլի 11-ին ու մինչ օրս կալանքի տակ էր Աթենքի ոստիկանության գլխավոր վարչությունում: Այսօր` ապրիլի 17-ին, նա, ինչպես ենթադրվում է, կտեղափոխվի քաղաքային Կորիդալլոս բանտ: Այս մասին հաղորդում է ITAR-TASS գործակալությունը:
Հունական ԶԼՄ-ների հաղորդմամբ՝ Աթենքի դատարանը, ապրիլի 16-ին լսելով Ցոխաձոպուլոսի մի քանի ժամանոց ելույթը, որոշել է նրան ուղարկել նախնական բանտարկության` «փողերի լվացման մեղադրանքով», որ իբր ստացել է ռուսական ТОР-М1 հրթիռային համակարգերի և գերմանական սուզանավերից մատակարարումից:
Ի պատասխան մեղադրանքների` նա կարդացել է շուրջ 20 էջանոց տեքստ, որտեղ հայտարարել է, թե «մեղավոր չէ այն բանում, ինչ իրեն վերագրվում է, էլ չասած այն իրավախախտումների մասին, որոնց մեջ մեղադրում են»:
Նախկին նախարարը հերքել է նաև, թե ունեցել է ինչ-որ առնչություն օֆշորային ընկերությունների հետ: Նա ընդգծել է, որ սուզանավեր ձեռք բերելու որոշումը կայացվել է արտաքին քաղաքականության ու պաշտպանության կառավարական խորհրդի հետ համատեղ, ու պահանջել է որպես վկա դատարան հրավիրել այդ խորհրդի անդամներին։
Ցոխաձոպուլոսը մասնավորապես մեղադրվում է Հունաստանի կողմից Գերմանիայից 4 սուզանավերի գնման ժամանակ բազմամիլիոնանոց կաշառք ստանալու մեջ:
71-ամյա նախարարը Հունաստանի ազգային պաշտպանության նախարարի պաշտոնն զբաղեցնում էր 1996-2001 թթ.:
